Companhiá Olandesa deis Índias Occidentalas
La Companhiá Olandesa deis Índias Occidentalas (« Geoctroyeerde Westindische Compagnie » en neerlandés) èra una companhiá coloniala formada per de marchands olandés. Existiguèt de 1621 a 1673 e aguèt un ròtle major dins l'establiment de la preséncia coloniala neerlandesa en America.
Recebèt lo drech d'esplechar leis Índias Occidentalas (America) e l'Africa Occidentala lo 3 de junh de 1621. Leis activitats de la Companhiá èra fòrça variada : establiment de comptadors per comerçar ambé leis indigèns, fondacion de colonias per i crear de plantacions, piratariá còntra lei naviris espanhòus e portugués. En particular, fondèt de comptadors e de fòrts en Ghana e en Angòla per practicar lo comèrci negrier e atacar lei naviris portugués, fondèt de colonias (Nòva York, Surinam... etc.) e assaièt de conquistar lo Brasil portugués entre 1630 e 1654. Pasmens, la màger part d'aquelei projèctes mau capitèron en causa de la resisténcia dei Portugués ò de la conquista de Nòva York per leis Anglés.
En 1674, la Companhiá arrestèt la piratariá e se concentrèt sus l'esplecha de sei colonias deis Antilhas e de Surinam. En 1791, foguèt crompada per lo govèrn dei Províncias Unidas.