(6) Hebe

(6) Hebe (vièlh simbòl: ) es un asteroïde de la cencha principala dau Sistèma Solar. Descubèrt per Karl Ludwig Hencke (1793-1866) lo 1^èr de julhet de 1847, contèn aperaquí 0,5 % de la massa totala de la cencha principala. Fa partida dei « gròs » asteroïdes d'aquela region. Sa caracteristica principala es sa densitat auta que s'explica probablament per una concentracion auta de fèrre e de niquèl, compres dins sei jaç extèrnes. Es lo cinquen asteroïde pus lusent dau Sistèma Solar.

En 1977, Paul D. Maley declarèt aver observat un satellit pichon en orbita a l'entorn d'Hebe. Pasmens, l'existéncia d'aquela luna es pas encara demostrada.

Caracteristicas

Comparason dei talhas dei dètz premiereis asteroïdes

Hebe sembla d'aver una forma angulara e sei dimensions generalas son estimadas a 205 km × 185 km × 170 km^[1]. Sa massa volumica, estimada entre 3,18^[2] e 3,76^[3], es relativament importanta per un asteroïde. Sa superficia es lusenta e Hebe es lo cinquen asteroïde pus visible dau Sistèma Solar. Aquela superficia seriá facha de silicats mesclats amb de metaus (fèrre e niquèl). Segon lei conoissenças actualas, la formacion d'Hebe auriá seguit tres etapas :

d'impactes importants aurián modelat sa forma generala e entraïna sa fusion. La màger part dau metau seriá tombada au centre mai una part significativa se seriá mesclada amb de silicats a la superficia.
d'impactes importants aurián fracturat e mesclat lei jaç geologics eissits dau refrajament d'Hebe.
d'impactes pus febles aurián tocat la superficia entraïnant la partença d'una part dei silicats. En consequéncia, la part metallica seriá venguda pus importanta.

En 2017, d'observacions menadas per lo VLT mostrèron l'existéncia de dos cratèrs importants a la superficia de l'asteroïde.

Orbita

Orbita d'Hebe entre Mart e Jupitèr

Hebe orbita dins la cencha principala d'asteroïdes entre Mart e Jupitèr. Seguís una trajectòria relativament excentrica (0,202) que li permet de virar a l'entorn dau Soleu en 3,78 ans. Son perièli (1,938 ua) se situa a proximitat de Mart es son afèli (2,914 ua) es pus alunchat.

Observacion

La magnitud aparenta d'Hebe se situa entre 7,5 e 11,5. Un instrument de poissança mejana permet donc de l'observar mai son identificacion pòt necessitar mai d'una nuech d'observacion per lo diferenciar gràcias a son movement pròpri diferent deis estelas. Es pas possible d'observar de detalhs precís de sa superficia amb leis instruments actuaus.

Liames intèrnes

Bibliografia

Nòtas e referéncias

↑ J. Torppa et al. "Shapes and rotational properties of thirty asteroids from photometric data", Icarus, vol. 164, p. 346 (2003).
↑ P. Vernazza et al. (2021) "VLT/SPHERE imaging survey of the largest main-belt asteroids: Final results and synthesis". Astronomy & Astrophysics, 54, A56.
↑ James Baer, Steven Chesley & Robert Matson (2011) "Astrometric masses of 26 asteroids and observations on asteroid porosity." The Astronomical Journal, Volume 141, Number 5.

[1] J. Torppa et al. "Shapes and rotational properties of thirty asteroids from photometric data", Icarus, vol. 164, p. 346 (2003).

[2] P. Vernazza et al. (2021) "VLT/SPHERE imaging survey of the largest main-belt asteroids: Final results and synthesis". Astronomy & Astrophysics, 54, A56.

[3] James Baer, Steven Chesley & Robert Matson (2011) "Astrometric masses of 26 asteroids and observations on asteroid porosity." The Astronomical Journal, Volume 141, Number 5.

[1]

[2]

[3]