Armada de tèrra cuecha

L’armada de tèrra cuecha ò armada d'argiela es un ensemble d'aperaquí 8 000 estatuas de soudats e de cavaus de tèrra cuecha que representan lei tropas dau premier emperaire de China, Qin Shi Huang (246-210 avC). Foguèt enterrat dins lei fòssas de son mausolèu. Segon leis escrichs dau cronicaire Sima Qian (145-86 avC), fasiá partida d'una reconstitucion pus globala dau palais de Qin Shi Huang que foguèt tanben enterrat amb de foncionaris, dei bastiments e de reconstitucions d'estructuras naturalas coma de rius. Pasmens, per de rasons de conservacion deis artefacts present, lo complèx funerari, d'una superficia totala de 98 km², es laissat a son estat actuau per leis arqueològs e es donc mau conegut.

Patrimòni Mondial de l'Unesco
Mausolèu dau premier emperaire Qin*
Fotografia d'un grop de soudats de l'armada de tèrra cuecha.
Coordonats	34/23/5.71/N, 109/16/23.19/E
Estat	China
Subdivision	Shaanxi
Tipe	Culturau
Critèris	(i) (iii) (iv) (vi)
Reconeissença	1987
Ficha	http://whc.unesco.org/fr/list/441

L'armada de tèrra cuecha foguèt tornada descubrir en 1974. Es contenguda dins tres fòssas que son pas estadas totalament cavadas car la pintura presenta sus leis estatuas es venguda fòrça fragila e resistís pas a l'accion de l'aire liure. La premiera fòssa contèn principalament de fantassins, la segonda d'unitats de cavalariá e la tresena lo comandament. Una quatrena fòssa èra prevista mai es demorada vueja. En mai dei soudats, se tròban tanben de representacions de foncionaris ò d'artistas.

Totei leis estatuas son estadas fabricadas a l'escala 1/1. Lei detalhs son fòrça realistas e l'equipament varia segon la talha, la foncion e lo grade dau soudat. Pasmens, per simplificar lo trabalh deis artesans, dètz visatges tipe foguèron utilizats per l'ensemble. A l'origina, leis estatuas avián d'armas vertadieras mai la màger part de l'equipament es estat pilhat ò a poirit. Aquò a pasmens laissat de vestigis importants (40 000 tròç de bronze) que permèton d'aver una idèa bòna dau materiau utilizat.

Liames intèrnes

• Qin Shi Huang.

Nòtas e referéncias

Modèl:Portal China