Campanha sovietica de Manchoria

La campanha sovietica de Manchoria (Operacion ofensiva estrategica en Manchoria en Russia) se debanèt dins lo corrent de la Segonda Guèrra Mondiala dau 9 d'aost au 2 de setembre de 1945. Foguèt la consequéncia d'una tiera d'ofensivas sovieticas e mongòlas (1 630 000 d'òmes) còntra Manchoria qu'èra tenguda per l'armada imperiala japonesa e sei supletius dau protectorat de Manchokuò (1 400 000 d'òmes). Acomençada entre lei dos bombardaments atomics de Hiroshima e de Nagasaki, prenguèt lei fòrças japonesas per sospressa e entraïnèt son afondrament rapide en causa de la superioritat materiala de l'Armada Roja (26 000 canons e 5 500 carris tecnicament superiors ai 6 000 pèças d'artilhariá e 1 000 carris japonés). En mens d'una setmana, lei Sovietics e lei Mongòls avancèron de 400 km. Lo 16 d'aost, jonhèron lei tropas dau Partit Comunista Chinés a Kalgan e lo 20, lo comandament japonés acceptèt de capitular sensa condicion. Pasmens, en causa de l'afondrament dei comunicacions japonesas, plusors pòchas de resisténcia contunièron de resistir. De son caire, lei Sovietics se contentèron d'enceuclar aquelei ponchs per perseguir son avançada vèrs lo sud e agantar Pòrt-Artur (23 d'aost) e lo 38^en parallèl (25 d'aost).

Fotografia de marins sovietics en Pòrt-Artur.

Durant l'ofensiva, l'armada japonesa perdiguèt 84 000 mòrts e 594 000 presoniers, compres 148 generaus e Puyi, l'emperaire de Manchokuò. L'Armada Roja e son aliat mongòla perdiguèron aperaquí 30 000 òmes (8 219 mòrts e 22 264 bleçats).