Organofosforat
Un compausat organofosforat es un tipe de compausat organic que contèn au mens un atòm de fosfòr. Estudiats a partir dau sègle XIX per de quimistas coma Jean Louis Lassaigne (1800-1859) e Philippe de Clermont (1831-1921), an una reactivitat relativament pròcha d'aquela dei compausats azòtats similars. A partir dau començament dau sègle XX, foguèron estudiats per produrre de pesticidas (malation, glifosat...) ò de gas de combat (sarin, VX...) car un certan nombre d'organofosforats son fòrça toxics. L'interès dei pesticidas organofosforats èra de remplaçar leis organoclorats, coma lo DDT, qu'èran l'objècte d'enebiments. Pasmens, dempuei leis ans 2000, son tanben l'objècte de mesuras similaras. Regardant lei gas de combat, son utilizacion es normalament interdicha per divèrsei tractats internacionaus mai plusors Estats an constituït de resèrvas en cas de guèrra importanta.
La quimia deis organofosforats es tradicionalament devesida en brancas diferentas qu'estúdian un estat d'oxidacion donat de atòm de fosfòr present dins la molecula. Lei pus importants son leis estats +III e +V mai existís egalament una quimia per leis estats 0, +I e +II. D'efiech, leis organofosforats son de compausats relativament reactius que pòdon participar a un nombre important de mecanismes reaccionaus coma la reaccion de Michaelis-Arbuzov, la reaccion de Mitsunobu, la reaccion de Staudinger e la reaccion de Wittig.