Ostrava

Ostrava es la tresena vila en nombre d'abitants de la Republica Chèca, darrèr Praga e Brno ambe una populacion de quicòm coma 300.000 abitants. La vila, qu'es a caval sus la frontièra entre las províncias istoricas de Moràvia e de Silèsia, es tanben la primièra vila de la Silèsia chèca. Es al cap d'una conurbacion de quicòm coma 500.000 abitants e d'una aira urbana, la segonda del país, de 1.100.000 abitants. Es situada al nòrd-est del país, a un desenat de km de la Polonha e 50 de l'Eslovaquia, a la confluéncia d'Oder e d'autres flumes o rius : Lučina s'i escampa dins Ostrawitza (o Ostravice); puèi Ostrawitza s'i escampa dins Oder en tant qu'afluent de riba dreta; Opava, que n'es un de riba esquèrra, s'i escampa tanben. Ostrava es la capitala de la region ("kraj") de Moràvia e Silèsia. Ostrava venguèt una granda vila mercés a sa posicion al còr d'un grand bacin carbonièr, e venguèt atal un centre industrial important. L'airal es escaissat "lo còr d'acièr" del país pr'amor de son estatut de centre carbonièr e metallurgic. Çaquelà, dempuèi la Revolution de Velós (la casuda del communisme en 1989), a conegut un càmbiament radical de son economia.