Sagèu postau

Un sagèu postau es una vinheta emesa per una administracion postala per afranquir lo corrier fisat a la pòsta.

Fotografia de sagèus postaus francés.

L'idèa dau sagèu postau apareguèt en Belgica vèrs 1830. Pasmens, conoguèt pauc d'aplicacions vertadiaras avans son adopcion per la pòsta britanica en 1840. Marquèt una revolucion importanta dins lo domeni dau transpòrt dau corrier. D'efiech, avans son aparicion, la pagament dau transpòrt, de còps fòrça costós, èra realizat per lo destinatari. Mai d'una letra èra donc refusada, çò que complicava lei comunicacions e entraïnava de pèrdas per l'administracion postala qu'aviá transportat lo corrier non acceptat. Lo sagèu postau permetèt d'inversar lo procès de pagament e de melhorar la fisabilitat de la distribucion. Lo sagèu postau se difusèt donc rapidament dins lei país occidentaus e sud-americans.

Lei sagèus modèrnes son formats d'un ensemble d'elements grafics obligatòris que son lo nom dau país emetor en alfabet latin e la valor fiscala. Segon lei país, d'autreis inscripcions pòdon aparéisser coma lo tipe de sagèu (dins lei país qu'utilizan per exemple de sagèus fiscaus), lo nom de l'administracion postala, lo nom de l'estampariá ò lo nom dau creator dau sagèu.

D'efiech, lei sagèus son venguts un element de l'identitat nacionala de plusors país. Sa concepcion obeís donc a de règlas particularas destinadas a assegurar sa qualitat. En parallèl, aquò a menat a l'aparicion de la filatelia qu'es una sciéncia que s'interessa a l'estudi e a l'evolucion dei sagèus postaus.

Liames intèrnes

• Corrier.
• Filatelia.
• Pòsta.