AMA Computer University
|
| |
| Motto | "Never rest on one's laurels" (E ka makukuntentu kareng tagumpe mung milabas) |
|---|---|
| Mitátag | October 15, 1980 |
| Uri | Privadu |
| Pamuntuk | Amable Aguiluz IX |
| Empleadu | Approx. 50 |
| Magaral king kolehiyo | Manga 2500 |
| Magaral a postgraduate | Manga 50 |
| Lugal | Quezon Lakanbalen, Metro Manila, Filipinas |
| Address | Villa Arca, Project 8 |
| Campus | 25,000 m² |
| Imnu | The AMA Hymn |
| Kule | Iro (azul) █ ampong Gintu █ |
| Palayo | The AMACU Titans |
| Kaugne | NAASCU, Philippine Association of Colleges and Universities (PACU) |
| Website/Karinan-Aptas | www.ama-university.com |
Ing AMA Computer University (AMACU) metung yang universidad a mayayakit king Project 8, Quezon Lakanbalen, Filipinas. Makatutuk ya kareng tecnologiang electronico, pang-informaciun ampong comunicaciun. Metung ya kareng marca o brand ning AMA Education Group. Gagamit yang calendariung trimestral, nung nu maliari yang ayari ing karaniwang apat a banuang cursu kilub ning atlung banwa at atlung bulan.
Tuturing deng metung kareng mabilis diling dagul kareng pipagaralan king Filipinas ing AMA Education Group. Banua-banua, atlu la anggang apat a libu (3000-4000) deng mayayari. Nanupata, ditak lang dili deng tatagun kareng alumni homecoming (pamagbalik da reng miyari) at aliwa pang actividad king kilual ning pamagaral.
Kasalesayan
AMA Institute
I Dr. Amable R. Aguiluz V ing mitátag king AMA Computer University. Pekilagyu ne king kayang tata, i Amable M. Aguiluz, Sr. Pengaku nang Dr. Aguiluz a mituru yang tungkul kareng computer agpang king kayang karanasan king pamamisaling computer. Tetag neng Aguiluz ing AMA Institute of Computer Studies king Shaw Boulevard kanitang October 20, 1980. Kanita, maki ampang yang mangakuyad a cursu king Electronic Data Processing Fundamentals, Basic Programming, and Technology Career ing kayang pipagaralan. Labi la mung atlu (13) deng magaral a migpalista anyang mumuna nang semestri niti.
Ing AMA Computer College, deng kayang sanga, at kayugneng pipagaralan
Migumpisa ya ing AMA Computer College kanitang June 1981. Mekaba ya itang kayang pamagaral bang maging apat a banwang cursung Bachelor of Science king Computer Science. Manibat king ditak mung magaral kanitang mumuna nang banwa, biglang mitas ing bilang da reng estudianti, king 600 kanitang 1983, at 2,000 kanitang 1985 ketang mumuna nang campus king Makati Lakanbalen. E miglwat, mitikdo ya ing centru nang campus king Quezon Lakanbalen. Adwa lang campus king provincia deng mitatag: detang king Cebu at Silicon Gulf, Davao.
Anyang mipasar ya ing Philippine w:Higher Education Act ning 1994, midayu ing upaya ning kapamahalan a pigilan ing bayad kareng privadung pipagaralan. Alutas ning AMA ing prublema ning ditak a magaral kapamilatan ning agresivung campania ning pamamisali, patalastas (advertising) at pamamalita/informaciun. Uli na ning kaparalanan a iti, migumpisa lang dagul deng escuela.
Kaybat nang linto ning AMACC, mitatag ya murin ing AMA Computer Learning Center (ACLC) kanitang 1986, at ing AMA Telecommunication & Electronic Learning Center kanitang 1996. Ing mumuna, maki ampang yang mangakuyad a cursu para kareng profesional, at adwang banwang cursung tecnical o vocational para kareng bisang makapagobra. Ita namang kadwa, metung ya kareng mumunang pipagaralan king Filipinas a makatutuk king telecommunications, electronics at aliwang tecnologiang maki kaugnayan kareti.
Metung kareng principiu ning AMA ing maging mumunang makagawa king sanumang bage. Iti ing mumunang piparagalan king Filipinas a lubusan yang ilub ing Internet o Aptas king kareng kayang cursu. Mika serviciu lang Internet deng eganagana nang campus. Manibat kanitang 1987, tuglung-tuglung no ngan deng mangaragul a campus ning AMA kapamilatan ning metung a w:local area network (LAN). Uli na niti, anti la mong meging metung a pipagaralan king mabilug a bangsa. Ing AMA murin ing mumunang pipagaralan a migtagumpeng mangipalyaring w:teleconference pilatan da reng kayang magaral matas a pipagaralan (high school) ampo retang king metung a high school mu naman king Canada kanitang 1994.
Kanitang 1991, ikwa nang Aguiluz a kilalanan (accredit) ne ning American League of Colleges and Universities (ALOCU) ing AMA Computer College, anya ing AMA ing meging mumunang pipagaralan a Filipinu at e Americanu a mirinan anti kaniting dangalan. Migit pa kaniti, megi yang oficial a kayanib ing AMACC king w:John F. Kennedy Educational Institute king Japan. Kikilalanan ne murin ning AMACC ning w:National Computer Center king w:United Kingdom.
Pamangawang Universidad
Dininan neng certificaciun ning SGS o Société Générale de Surveillance International Certification Services Canada, Inc. ning AMA Computer College kanitang Marzo 1999.
Ing buri nang sabyan niti, mesuri ne at merehistru ing quality Management System o kaparalanan ning pamanibala king calidad ning AMACC, at mipasar ya kareng pamangaylangan ning ISO 9001. Kaylangan yang mantinian o panatilian ing certificaciun ning ISO. Lalon de reng talasuri (assessor) balang kanam a bulan.
Mirinan yang kabilyan a universidad ing AMACC king Quezon Lakanbalen kanitang Agosto 20, 2001. Ing AMACC Quezon City megi yang AMA Computer University.
Kanitang 2004, mika kasundwan ya ing AMA Computer University ampo ing iCarnegie ning Carnegie Mellon University ba yang gamitan ing kayang curriculum ampong cursu kapamilatan ning e-learning. Agpang king Pamuntuk ning iCarnegie at ning CEO a i Allan Fisher, "the academic relationship between STI and iCarnegie went well, the business side of the agreement did not go as planned". ("Masalese ing daneng pangpamagarala, dapot e melaus ing itang maki kaugnayan king negociu") [1]
Deng Aliwang Campus ning AMA Computer College
E no pepaintulutan ning w:Commission on Higher Education (w:CHED) deng aliwang campus ning AMA a gamitan de ing titulung “w:University”, at “w:College” mu o “w:Institute” ing malyari dang gamitan uling e ra pa ayabut ing adwan na niting agenciang manibala king pamagaral.
Ketang 2003, mekipagkasundu ya ing AMA king kapamahalan ning emirate ning Bahrain ba yang itatag ing AMA International University king Manama.
Atin yang dinalan limampulung libung (150,000) magaral ing AMA Educational Group. Adwa lang dalan (200) deng kayang campus king Filipinas at aliwa pang dake ning yatu.