Chano Margaretha

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

Modesto Apostel (Chano) Margaretha (☆ 24 di febrüari 1914 na Rooi Santu - † 5 di mart 1990 na Kòrsou) tabata un polítiko di Kòrsou di Partido Demokrat. Na 1958 e tabata e promé konsehal ku a papia papiamentu durante un reunion di Konseho Insular di Kòrsou. Esaki a wòrdu mira komo un akto heroiko.

Chano Margaretha

Bida

Chano Margaretha a nase i lanta den bario di Rooi Santu. El a kuminsa su karera komo karpinté, trahando pa diferente kontratista. Despues el a nabega un tempu i a traha na refineria Isla i refineria Lago na Aruba.

Margaretha tabata den polítika pa gran parti di su bida. El a sirbi na tres okashon komo miembro di Konseho Insular di Kòrsou: 30 di novèmber 1957 te 26 yüli 1958; 16 di yanüari 1959 te 26 di yüni 1959 i 21 di febrüari 1961 te 24 di yüni 1963. Komo akto di protesta e ta hiba palabra na idioma Papiamentu den e reunion públiko di Konseho Insular di dia 8 di febrüari 1958. Margaretha tabata e promé persona pa hasi tal, ya ku na 1958 hulandes tabata e úniko idioma ofisial na Kòrsou i tabata wòrdu usa den politika tambe. E debate largu ku a sigui ta resulta den un moshon pa djei padilanti papia Papiamentu den reunion. E moshon ta wòrdu aksepta unanimamente. Finalmente na 2007 Kòrsou ta ofisialisá papiamentu komo idioma ofisial.

Margaretha tabata kasa ku Sarah Phelipa i tabata tata di shete yu.

Honor

Komo rekonosimentu e Komishon Nòmbernan di Kaya ta kambia na 2015 e nòmber di Kaya Rooi Santu pa Kaminda Modesto A. (Chano) Margaretha, libertadó di idioma papiamentu. E mesun aña minister di Enseñansa, Siensia, Kultura i Deporte, Irene Dick, ta proklamá dia 8 di febrüari komo Dia Nashonal di nos lenga materno papiamentu.

Fuente, nota i/òf referensia