Trinta di Mei

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

Trinta di Mei ta referí na e wèlga di trahadónan di refineria Shell (despues di 1985, yamá Refineria Isla) na Kòrsou riba dia 30 di mei 1969. Esaki a kousa dos morto i dies persona heridá. E dia akí tabata un punto históriko ku a marka kambio den e sistema polítiko, e kultura i e relashonnan sosial-ekonómiko di Kòrsou. E movementu a krea un partido polítiko nobo, kual tabata Frente Obrero i Liberashon 30 di mei, bou di liderazgo di Papa Godett. Durante e periodo akí Cola Debrot tabata gobernador di Antia Hulandes.

Video di notisia hulandes tokante e wèlga

Origen i kousa

Den añanan 60 di siglo 20 ekonomia di Kòrsou tabata bai atras. Forsa di kompra a baha komo ku preisnan tabata subi drástikamente i no tabatin oumento di suèldu. E sistema di kontratista di Shell a kousa hopi disturbio sosial. E sistema akí, kaminda Shell ta kita trahadónan for di trabou pa remplasá nan ku kontratistanan ku tabata kobra ménos na salario, i ku no tabatin un seguro antó ku por a hasi e mesun trabou ku un trahadó fiho.

Loke a kousa e wèlga direktamente tabata e negosiashonnan pa un CAO (collectieve arbeids overeenkomst) nobo ku a stanka. Wescar, kontratista ku tabatin un kontrato fiho ku Shell, tabata responsabel pa e desaroyo di e CAO. E sindikatonan no por a bai di akuerdo ku Wescar.

Por wòrdu derivá ku un wèlga asina por a eskalá di intensidat te ora e yega na un nivel di rebelion, pasobra e polítika lokal no a mira e urgensia di reformá e sistema sosial riba e isla. Den e añanan promé ku trinta di mei por a nota algun advertensia di peliger. E poblashon koló klá tabata presta mas mihó ku esun koló skur i nan tabata permanesé mas den un villapark será kaminda e individuo koló skur por a solamente drenta ora ku wòrdu invitá dor di un habitante koló klá. E poblashon koló skur aunke e por a vota, kasi e no tabatin poder den gobièrnu. Den parlamento di Antias Hulandes, papiamentu tabata un lenga prohibí.

Ofisialnan di gobièrnu antiano a proklamá tambe ku e media di Kòrsou, primeramente korant i radio, tabata un di e kousanan di e rebelion. Hendenan na Kòrsou tabata bon na haltura di e susesonan ku tabata tuma lugá na Merka, Oropa i tambe Latino Amerika, tambe hopi antiano tabata bai studia afó i hopi turista di Merka i Hulanda tabata bin bishitá Kòrsou. Banda di esei hopi estranhero a bin traha na e refineria i tur esaki a kousa ku e yu di kòrsou tabata tin bon konosementu di loke tabata pasando den eksterior. E rebelion a duna un similaridat di revolushonnan anti-kapitalista, anti-kolonialista i anti-rasista ku a pasa rònt mundu durante e tempu ei kual esaki tabata un influensia hopi paresido na e revolushon cubano. Trahadónan di gobièrnu lo a asta deklará falsamente ku komunistanan kubano mes a kuminsá òf tabata involví den kuminsamentu di e rebelion. Aunke ku e revolushon tabata tin efekto indirekto den e sentido ku el a inspirá hopi di e partisipantenan, hopi di e lidernan di e rebelion a bisti unifòrm koló khaki, similar na esunnan ku tabata bistí dor di Fidel Castro. Na mesun momentu, e fenómeno di "Black Power" tambe tabata emergi rònt di Karibe i na Merka, aunke e figura i lidernan no tabata direktamente involví na Kòrsou, nan a duna inspirashon na e partisipantenan. Manera na Merka, i paisnan karibense por ehèmpel Jamaica, Trinidad i Tobago of Barbados hende koló skur na Kòrsou tabata afektá disproporshonalmente dor di pobresa i mester a anda ku rasismo i diskriminashon den e sistema. E movementu ku a yega na 30 di Mei tabata usa hopi di e símbolo i argumentonan ku e movementu di "black power" i otro movementunan di derechi sivil rònt mundu.

Wèlga

Shell refineria na Kòrsou (1975)

Riba e anochi di 29 di mei 1969 ora ku e reunion di sindikato a kaba tabata tin un grupo ku no tabata kontentu ku e desishonnan ku a wòrdu tumá pa atendé ku e sistema di kontratista. Un grupo a kana bai Cinelandia na Punda i a kuminsá benta bakinan di sushi abòu mientras ku polisnan a aparesé na e esena i a purba pa trese orden bèk.

Mainta riba dia 30 di mei 1969, mas sindikato a anunsiá ku nan lo bai wèlga e dia akí pa apoyá e lucha di CAO kontra di e kontratistanan. Tabata tin un grupo di tres pa kuater mil trahadó akumulá dilanti Post 5 di Refineria Shell. Aunke e CAO a enfatisá ku esaki tabata djis un disputa ekonómiko, Papa Godett, lider di e trahadónan di dòk i aktivista, a konvoká un lucha polítiko den su diskurso na e welgadónan. El a hasi un yamada pa un otro marcha pa bai Fort Amsterdam, kual tabata mas ku dies kilometer for di kaminda nan tabata. Na e momentu ei e grupo a kuminsa move bai direkshon di sentro di siudat, un grupo ku tabata konsistí di mas o ménos 5.000 trahadó, mayoria di nan tabata koló skur. Mas i mas hende a bira parti di e marcha akí den sentro di suidat ku ora e la pasa kantu di kaya e lidernan di e wèlga original tabatin tiki kòntròl riba e grupo su akshonnan.

Intensifikashon di demostrashon

A sende un trùk (pick-up) ku un automobilista koló klá na kandela i na final a sakia edifisionan komersial grandi. E wèlgistanan a ataká e fabrika di Coca-Cola i di Texas Instruments i nan a drenta e fabrikanan pa demanda i para e produkshon pa liberá e trahadónan. Texas instruments tabatin un mal reputashon entre e poblashon lokal pasobra esaki a prevení su trahadonan pa forma un sindikato. En prinsipio no a ataká kas ni edifisio públiko; pero ora a bin haña sa, polis a move pa purba pone un paro na e wèlgamentu i sakeo. Tambe a pidi asistensia na SKS, i soldá hulandes ku tabata stashoná riba e isla dor ku tabata tin solamente sesenta officier na e esena i nan no por a hasi nada pa para e violensia.

Stampia 30 di mei ku portrèt di Papa Godett, Amador Nita i Stanley Brown

. Riba e ruta pa marcha bai Fòrti wèlgistanan a bin topa un barera polisial na seru di Parera. Den e enkuentro a kai dos morto: Manuel Gutierrez i Orlando Gerardina. Polis a tira Gutierrez ora esaki a manda un outo di polis na kandela riba e kordon. Gerardina a haña bala ku probablemente a rebotá bin riba dje. Wilson (Papa) Godett tambe a haña bala den lomba i mester a bai hòspital. Supuestamente Papa Godett a bisa ku polis tabata tin e orden spesífiko pa pone un fin na su bida i polis lo a bisa ku nan a solamente hasi loke tabata nesesario pa sigurá nan mes bida. E echo ku Godett a haña bala a kambia e demostrashon i hasié mas intenso. Un parti chikí di e marcha a bai hòspital pa sigui e desaroyo di Papa su bida i salú i e otro parti di e marcha a move bai sentro di siudat. Ei un grupo grandi a parti den gruponan mas chikí ku a sakia un kantidat di pakus i tambe un teatro.

Breedestraat, Otrobanda, mas o menos aña 1900, unda varios edifisio a keda sakea i destrui

Polis, SKS, brantwer, marina hulandes i otro boluntarionan lokal a bringa duru pa pone un paro na e protestanan, paga e kandelanan, i vigila banko i otro edifisionan balioso ku por a wòrdu hortá. Hopi di e edifisionan den suidat tabata bieu i pesei nan a kima fasil, pero tambe e lay-out kompakto di e sentro históriko a hasié hopi difisil pa yega kaminda nan esfuerso tabata nesesario. Den oranan di atardi, pastornan a saka un statement riba radio pidiendo sakeadónan pa stòp i na mes momentu lidernan di sindikato a anunsia ku nan a yega nan un akuerdo ku Werkspoor/Wescar. Segun e akuerdo aki, trahadónan di Shell lo risibí un pago igual maske nan tabata kontratista of no, i esaki tambe no tabata depende di nan origen nashonal.

Pero, aunke e lucha su metanan ekonómiko a wòrdu yegá, e wèlganan a sigui te den anochi per poko poko e la baha riba dia 31 di mei. E rebeldia e ora ei a kambia i focus riba metanan polítiko. Lidernan di sindikato, radikal i tambe moderá, a demanda pa baha gobièrnu, i a menasá ku un welga mas grandi. Riba 31 di mei, lidernan di trahadónan a tene reunion ku lidernan di sindikato di Aruba, i tambe otro partinan di Antia. E delegashon di Aruba a bai di akuerdo ku e bahamentu di gobièrnu, i a anunsiá ku trahadónan di Aruba tambe lo wèlga si esaki no lo pasa. Riba e anochi di 31 di mei pa 1 di yüni violensia a kaba i 300 marinir hulandes a bin pa mantene orden.

Resultado

Video di notisia di elekshon pa parlamento despues di e disturbionan

Na tur, e rebeldia a kosta bida di dos persona identifiká komo Manuel Gutierrez i Orlando Gerardina, mas 22 polis i 57 personanan na sivil heridá. Tabatin 322 detenshon i tambe a kima 43 negoshi i 10 otro edifisio durante di e wèlga miéntras ku 190 edifisio a keda severamente dañá i kandela a destruí trinta (30) vehíkulo. E daño total a sali aproksimadamente 40 mion dòler merikano. E sakeo tabata dirigí riba negoshinan sea konosí pa eksplotashon òf ku e demostrantenan tabata asumí ku nan tabata eksplotadó. E rebeldia a logra su metanan ekonómiko, igualdat di salario pa trahadónan di Shell, ademas di su metanan polítiko, for di 3 di yüni parlamento di Antias Hulandes, poné bou di preshon di Kamara di Komersio, ku tabata tin miedu pa mas wèlga i violensia, a anunsiá elekshon nobo pa september di e aña ei. Promé minister Ciro Kroon a wòrdu elegí durante e rebeldia, pero despues el a retira. Dia 26 di yüni, e gobièrnu interino bou di promé minister Gerald Sprockel a tuma mando di Antias Hulandes. Elekshonnan pa parlamento di Antias Hulandes a wòrdu fihá pa 5 di sèptèmber.

Fuente, nota i/òf referensia