Cododo

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Cododo (Cnemidophorus arubensis) ta un especie di famia Teiidea. E lagadishi embra o hoben ta conoci como Lagadishi, mientras cu esun nan madura y macho ta wordo yama Blauw blauw. E especie aki ta nativo na e isla di Aruba y ta reconoci como e especie mas comun y abundante di e isla.

Cododo
Status di IUCN: No menasa (2016)
Macho
Clasificacion taxonomico
Reino: Animalia Troncon: Chordata Clase: Reptilia Orden: Squamata Suborden: Scincomorpha Famia: Teiidae Genero: Cnemidophorus
Especie
Cnemidophorus arubensis Lidth de Jeude, 1887
Sinonimo
Cnemidophorus lemniscatus arubensis
Cododo
Imagennan riba Wikimedia Commons
Cododo riba Wikispecies
Cododo riba  N =  DCSR
[Edita Wikidata] · [Manual]

Identificacion

C. arubensis ta crece te un largura di aproximadamente 15 centimeter.

E macho tin un cabes blauw cu pia y rabo blauw-berde. E resto di e curpa ta bruin-greis. Ademas, nan ta exhibi manchanan den forma di un punto blanco te cu un blauw intenso ubica lateral (na banda) di e curpa y ariba e pianan patras.

E embra y hobennan ta diferencia di e macho a base di diferente aspecto. Un di aspectonan ta nan color bruin cu e mesun manchanan cu e macho, pero cu color menos pronuncia. Ademas, e embra madura, ta strepia cu dos strepi paralel na e banda dorsal (e spina) di e curpa. E strepia ta extende for di e cabes te na rabo. E embra cu e hobennan ta varia asina hopi cu hende ta kere cu e ta di un otro tipo.

Teiidae tin kliernan den forma di porio, conoci como porio femoral (di Ingles: femoral, "parti ariba di pia") cu ta hunga un rol den e secrecion di fermoon (un tipo di hormoon cu ta actua pafo di e curpa di e individuo). E porio femoral, ubica na e las di e pia ariba, ta relativamente mas grandi cerca e macho cu nan ta cerca e embra. Adicional, e macho tin porionan cu ta precedi e area anal.

Lagadishi (embra)

Dieet

C. arubensis consumiendo nectar di un flor geel di un Tuna (Opuntia caracassana).

Den e famia Teiidae di lagadishi, a observa un adaptacion notabel cu ta observa den varios especie nativo di islas: un transicion na dieet di herbivoor. E cambio ta particularmente evidente den dos especie, C. arubensis y C. murinus.

C. arubensis tin un dieet varia, cu ta inclui insecto y principalmente material vegetal manera flor, nectar, blachi di mata, y fruta. Sin embargo, nan ta selectivo den nan seleccion di mata pa consumo, evitando esun nan venenoso cu cantidadnan halto di fenol,^nl saponine^nl, y alkaloïden^nl (manera kinine^nl).

Coprofagia, e consumo di excremento, ta wordo observa cu C. arubensis. E tripa den e especie aki ta mas grandi cu den otro especie di Cnemidophorus, claramente adapta na un dieet di herbivoor. Den su habitat natural y sin disturbio, aproximadamente 80% di e contenido di e stoma ta consisti di material vegetal, cu alrededor di 15% ta insecto y otro arthropoda. E resto ta inclui material como excremento, piedra chikito, taki.

Patrono di comportacion

Comportacion teritorial

E machonan grandi ta posee un teritorio cual ta contene unicamente embra y hobennan, pues ningun otro macho madura. E macho teritorial lo purba di impone e intruso dor di para halto ariba su pianan pa exhibi e grandura di su curpa. Si e intruso no sali, e chens ta grandi cu un pelea lo sigui, locual e doño di e teritorio ta gana.

Comportacion di reproduccion

Copulacion entre cododo macho y embra

Den mayoria di e Cnemidophorus, e color di e machonan dominante ta bira un poco mas intenso durante temporada di reproduccion, cu ta tuma luga for di september te cu october. Sinembargo, C. arubensis ta mustra un diferencia distincto den e aspecto aki. E machonan madura ta pasa dor di un transformacion unda un gran parti di e curpa ta cubri cu un color blauw intenso.

Teiidea ta un animal oviparo, y e tamaño di troshi di webo ta asocia cu e grandura di curpa. Mientras cu Cnemidophorus ta produci un troshi di webo cu ta varia 2 pa 6 webo, C. arubensis, ta produci un solo webo, aunke uno grandi.

Señal di pia dilanti

E señalamento frecuente cu e pia dilanti ta un comportacion tipico di C. arubensis y tambe por wordo observa den C. lemniscatus. E comportacion aki, den C. murinus murinus y C. murinus ruthveni, ta parce di ta relativamente menos frecuente.

Movemento di lenga

Den presencia di quinina compara cu su ausencia, tanto C. arubensis como C. murinus, ta mustra un probabilidad mas halto di extension rapido di nan lenga gesplit, pa aproximadamente 100 miliseconde. Nan ta parce di por detecta quinina hasta prome cu nan yega cerca di nan cuminda.

Lista di fuente

• Buurt, G. van (2005). Fieldguide to the Amphibians and Reptiles of Aruba, Curaçao and Bonaire (Chimaira ed.). ISBN 9783930612666. https://www.dcbd.nl/document/fieldguide-amphibians-and-reptiles-aruba-curaçao-and-bonaire. Retrieved 2024-01-04. 
• Cooper Jr., William E.; Pérez-Mellado, Valentín; Vitt, L.J.; Budzinsky, Brandy (2002). Behavioral responses to plant toxins by two omnivorous lizard species. 76. 297-303. doi:10.1016/S0031-9384(02)00715-1. 
• King, G.M. (1996). Reptiles and Herbivory. Springer Netherlands. ISBN 9780412461101. 
• (1887). Notes from the Leyden Museum. 9–10. Netherlands: Rijksmuseum van Natuurlijke Historie te Leiden. https://books.google.com/books?id=UdDRAAAAMAAJ. Retrieved 2023-07-08. 
• Pianka, E.R.; Vitt, L.J. (2003). Lizards:Windows to the evolution of diversity. United Kingdom: University of California Press.. ISBN 9780520248472. https://archive.org/details/lizardswindowsto00pian. Retrieved 2023-07-07. 
• Schall, Joseph J. (1974). Population Structure of the Aruban Whiptail Lizard, Cnemidophorus arubensis, in Varied Habitats. 30. 38-44. 
• Schall, Joseph J. (1990). Aversion of Whiptail Lizards (Cnemidophorus) to a Model Alkaloid. 46. 34-39. https://www.jstor.org/stable/3892600. 
• Vitt, L.J.; Zug, G.R.; Caldwell, J.P. (2001). Herpetology:An Introductory Biology of Amphibians and Reptiles. Elsevier. ISBN 9780080549408. 

Referencia