Impreshonismo
Impreshonismo tabata un movementu artístiko moderno, ku a surgi na Fransia, rònt di añanan 1860 pa fin di siglo 19. El a revolushoná pintura dor di kapturá e efektonan pasahero di lus i koló. Impresionistanan a rechasá realismo i konvenshonnan akadémiko pa desaroyá un estilo nobo ku ta enfoká riba impreshonnan visual transitorio.[1]
| Impreshonismo | ||
|---|---|---|
| ||
Pierre-Auguste Renoir su Almuerso di remadó (1880-1881), un obra impresionista ehemplar ku ta kombiná kasi tur e karakterístikanan di e movementu
| ||
| Informashon básiko | ||
| Inisio | 1874 | |
| Lugá inisial | Fransia | |
| Inventor | Louis Leroy, Francesco Filippini, Claude Monet | |
| Artista notabel | Claude Monet, Pierre-Auguste Renoir, Edgar Degas, Paul Cézanne | |
| A Influensiá | Neo-impreshonismo | |
Imágennan riba  Wikimedia Commons
| ||
| [Editá Wikidata] · [Manual] | ||
E movementu aki a habri e porta pa estilonan despues, inkluyendo post-impreshonismo i ekspreshonismo abstrakto. Impreshonismo tambe a eksperensiá periodonan di floresemento despues di e tempo aki, spesialmente den otro paisnan pafó di Fransia. E influensia di impreshonismo no tabata limitá na pintura, pero tambe den otro formanan di arte, manera músika klásiko, literatura, eskultura i fotografia.
Impershonismo a desafiá e métodonan i estilonan di pintamentu tradishonal ku un aserkamentu nobo pa portrètá lus i koló. E impresionistanan tabatin komo meta pa kapta e impreshon visual suphetivo di un momentu i esena, en bes di krea representashonnan realístiko. Nan tabata pinta pafó (franses: en plein air; 'aire liber' ) ku spontaneidat, eksperimentando ku koló bibu usando téknika di kuashi distinto, i ku ángulonan visual i kòrtamentu di esena den un forma inusual.[1]
Artistanan impresionista manera Claude Monet, Pierre-Auguste Renoir, i Edgar Degas tabata enfoká riba kapturá e efektonan di lus usando téknika di kuashi rápido ku koló puru, sin mesklamento di koló. Nan pinturanan tabatin un kalidat di skètsmentu, briyando ku lus i vibransia. Ounke inisialmente kontroversial, impreshonismo a kibra for di tradishonnan akadémiko estrikto i temanan klásiko pa ofresé un bista moderno i pasahero di bida, formá pa impreshonnan personal di naturalesa, koló, i lus.[1]
Historia
editáRealismo i naturalismo
editáOunke impreshonismo tabata un movementu revolushonario, el a saka influensia signifikante for di estilonan anterior manera realismo i naturalismo, ku ya tabata desafiando ideanan tradishonal di beyesa artístiko i e relashon entre artista i sosiedat.
Realismo, enkabesá pa Gustave Courbet, tabata e promé pa konfrontá direktamente e establesimentu di arte ofisial di Paris na mitar di siglo 19. Courbet, un anarkista, tabata kere ku e arte di su era tabata ignorá e realidatnan duru di bida. E tempu ei, Fransia tabata bou di un régimen opresivo, i gran parti di e poblashon tabata sufri den pobresa. Tòg, artistanan a enfoká pa gran parti riba sunúnan idealisá, temanan klásiko i mitológiko, i representashonnan glorifiká di naturalesa. Den un akto tribí pa desafiá, Courbet a finansiá su mesun eksposishon, direktamente net dilanti di e Eksposishon Universal na Paris na 1855. E protesta aki a inspirá futuro artistanan ku a buska pa desafiá e status quo artístiko.
Simultáneamente, naturalismo a surgi komo un movementu estrechamente aliña ku realismo, demostrando kon arte por a deskribí e mundu natural sin e kapa di heroismo históriko òf mitológiko. For di añanan 1820, artistanan manera Jean-Baptiste-Camille Corot i Jean-François Millet a biaha pa e mondi di Barbizon, sùit di Paris, pa krea skèts den aire liber di pal'i mata, esena i trahadó di kampo. E Skol di Barbizon a marka e komienso di un kambio mundial den pintura, enfatisando e bunitesa sin embeyesementu di e mundu natural i selebrando e bida di trahadónan di kampo.
Miéntras ku naturalismo tabata enfoká riba detayenan hiper-realistiko, por ehèmpel pa artistanan manera Jules Bastien-Lepage, e tabata kompartí balornan sentral ku impreshonismo. E impresionistanan a heredá e apresio di e naturalistanan pa e mundu natural i e téknika di aire libre, konstruyendo riba nan prinispio, balor, i ideanan miéntras tanto kreando un estilo distinto i inovativo.[2]
Salón di e Rechasá
editáNa 1863, e salón di arte anual, e evento ofisial i prinsipal di e mundu di arte franses, a rechasá un kantidat grandi di entrega, loke a kousa indignashon públiko. Komo kontesta, a establesé Salon des Refusés ("Salón di e Rechasá") pa mustra e obranan di artistanan ekskluí for di e salón ofisial. Entre e artistanan destaká tabata Paul Cézanne, Camille Pissarro, James Whistler i Édouard Manet.
Ounke sanshoná pa Emperador Napoleon III pa kalma e artistanan malkontentu, e eksposishon di 1863 a lanta kontroversia signifikante. E públiko a keda den shòk pa e temanan i estilonan no-konvenshonal e obranan, partikularmente Manet su Le déjeuner sur l’herbe ("E almuerso riba e yerba", 1863). E pintura aki tabata portrètá hòmbernan bisti banda di muhénan sunú disfrutando di un piknik. Kontrali na sunúnan klásiko tradishonal, e muhénan den e obra di Manet tabata figuranan moderno, posiblemente prostituta, kende nan estado sunú tabata karga implikashonnan seksual, habri pa publiko, desafiando normanan sosial i konvenshonnan artístiko.
Édouard Manet tabata un di e promé inovadónan mas influente pa aparesé den e esena di eksposishon públiko di Paris. Miéntras e tabata atmirá e Maestronan Bieu durante su hubentut, el a kuminsá desaroyá un estilo di pintamentu mas suave i usando un palèt di koló mas briante na kuminsamentu di añanan 1860. Manet tambe a kambia su enfoke pa suhetivonan di bida diario, portretando esenanan di kafé, boudoir (un camber òf salon priva pa hende muhé), i kaya.
Su aserkamentu anti-akadémiko i materia moderno pronto a kapta atenshon di artistanan ku tabata traha pafó di e establesimentu di arte tradishonal. Manet su obranan pionero, manera Olympia (1863), similar na E almuerso di yerbe, ta presentá un muhé sunú, moderno, ku ta embolbí e miradó ku konfiansa, a inspirá e movementu impresionista emergente. E representashonnan tribí aki a enkurashá artistanan pa eksplorá temanan, ku anteriormente tabata wòrdu konsiderá indigno di arte bunita, yudando pa redefiní e fronteranan di ekspreshon artístiko.[2]
Kultura di café
editáCafénan di Paris tabata un di e lugánan di enkuentro faborito pa e pintornan di e movementu impreshonista emergente. Un di e lugánan mas notabel tabata Café Guerbois na Montmartre, kaminda Édouard Manet a kuminsá reuní ku otro artistanan na 1866. Bishitantenan regular tabata Pierre-Auguste Renoir, Alfred Sisley, Edgar Degas, Claude Monet, Paul Cézanne, i Camille Pissarro. Tayernan den serkania ku ta pertenesé na Gustave Caillebotte, i Frédéric Bazille tambe a sòru pa ta frekuente presente. Eskritornan, krítikonan i fotografonan tambe a gravitá pa e enkuentronan aki, enrikesendo e interkambionan di e grupo.
Un faktor klave den e energia kreativo di e grupo tabata su meskla dinámiko di personalidatnan, klase ekonómiko i puntonan di bista polítiko. Monet, Renoir i Pissarro a bini di famianan di klase trahadó, miéntras ku Berthe Morisot, Gustave Caillebotte i Degas tabatin raisnan di klase altu. Mary Cassatt tabata merikano i hende muhé, i Alfred Sisley tabata anglo-franses. E diversidat di perspektivanan aki probablemente a kontribuí na e ideanan riku i inovativo ku a surgi for di nan diskushon i kolaborashonnan kolektivo.[2]
E lucha di e impresionistanan
editáOunke ku e impreshonistanan no tabata uni ainda riba un estilo spesífiko, e grupo tabata kompartí un despresio komun pa e normanan akadémiko limita di arte bunita. Pa afirmá nan independensia, nan a forma un koperativa komersial konosí komo e Sosiedat Anónimo di Artista, Pintor, Eskultor, Grabadó, pa menshona un par. Éksito finansiero a evadí mayoria di nan, i nan obranan tabata wòrdu aseptá masha poko pa e prestigioso eksposishonnan di Salòn di Paris. E kooperativa a bira krusial den sostené nan libertat kreativo i proveé un grado di stabilidat finansiero.
Na 1874, e grupo a tene nan promé eksposishon independiente den e tayer di fotografo, Félix Nadar. Tabata te na nan di tres eksposishon na 1877 ku nan a adoptá e nòmber, E Impreshonistanan. Miéntras ku e promé eksposishon a hala atenshon públiko limitá, eksposishonnan despues a atraé multitutnan grandi, ku presensia yegando na míles. Apesar di e interes kresiente, mayoria di e miembronan a bende poko obra, i hopi a keda den difikultat finansiero severo durante henter e periodo aki.[2]
Impreshonismo
editá
E movementu a saka su nòmber for di un kritiká severo di e krítiko franses Louis Leroy, kende, komo kontesta na e promé gran eksposishon di impresionista na 1874, a hasi bofon di e título di e pintura di Claude Monet, Impression, soleil levant ("Impreshon, salida di solo", 1873). Leroy a akusá e artistanan di krea nada mas ku "impreshonnan", un etikèt ku e grupo a adoptá irónikamente. Den añanan despues, nan a referí na nan mes tambe komo e "Independentenan", un señal di e prinsipionan di tumb'abao di e Société des Artistes Indépendants ("Sosiedat di Artistanan Independiente"), fundá na 1884 pa pintornan impresionista ku tabata buska pa kibra for di konvenshonnan artístiko akadémiko.
Ounke e estilonan di e impresionistanan tabata varia pa un gran parti, i no tur miembro a aseptá e etikèt di Leroy, nan tabata kompartí un interes komun den kapturá impreshonnan optiko pasahero i momentunan transitorio di bida moderno. Nan obranan a buska pa representá e eksperensia di persepshon visual den maneranan ku a desafiá aserkamentunan tradishonal di arte.[2]
Influensia di fotografia
editáImpreshonismo tabata debí masha na e binimentu di fotografia, un medio ku a revolushoná representashon visual. E orígennan di fotografia ta kompleho i multinashonal, pero un logro klave tabata e revelashon di e Daguerreotipo (promé prosedura fotografiko) di e inventor franses Louis Daguerre na Paris na 1839. E teknologia aki a permití imágennan wòrdu transferí riba un blachi di koper tratá ku plata ku ta reakshoná riba lus, kapturando un impreshon direkto di realidat riba e superfisie di dos dimenshon. E proseso a transformá kon hende a graba mundu i nan bida. Pa 1849, fotografia a bira inmensamente popular, ku 100.000 habitante di paris tabata para pa wòrdú portrètá tur aña.
Fotografia a influensiá impreshonismo den dos manera. Promé, el a amplia e persepshonnan di kiko tabata digno di representashon artístiko. Pintura akadémiko tradishonal na Fransia a priorisá temanan mítiko i históriko òf portrèt di lider i héroenan nashonal. Fotografia, sinembargo, a demostrá ku hende komun, esenanan urbano, edifisionan i paisahenan por wòrdu konserbá visualmente. E kambio aki a inspirá pintornan impresionista pa dirigí nan atenshon riba esenanan di café, kayanan druk i plasanan vibrante. E obranan aki no solamente a reflehá un ambiente urbano dinámiko pero tambe un kreensia nobo ku e tipo di temanan aki ta bale la pena pa kapturá.
Na di dos lugá, fotografia a introdusí pintornan na e konsepto di komposishon spontáneo. E la siña nan ku un portrèt por fris un momentu pasahero den tempu i tambe portrètá un lugá den espasio. Por ehèmpel, Degas su Place de la Concorde ("Plasa di Concorde") no ta djis un pintura di un plasa públiko di Paris; e ta un portrèt di e plasa na un momentu spesífiko, ku ta mustra hende i bestia den moveshon. E areglo aparentemente di kualke figura den moveshon den e obra, i otro obranan impresionista, ta reflehá kon profundamente embolbí impreshonismo ta ku e abilidat di fotografia pa kapta un milisekònde di tempu. Promé ku e binida di e teknologia aki, representashonnan asina presis temporalmente tabata pa gran parti ousente den arte.[2]
Impreshonista prominente
editáOunke nan a eksponé huntu, kada pintor impresionista tabatin un estilo i enfoke úniko. Claude Monet a kapturá lus i koló pasahero, pintando e mesun esena bou di diferente kondishon. Pierre-Auguste Renoir a destaká lus ku ta filtra dor di blachi i esenanan alegre di habitante di Paris. Berthe Morisot a portrètá hende muhé i mucha den ambientenan doméstiko. Edgar Degas a eksplorá balèt i kareda di kabai, usando komposishonnan inusual i asimétriko pa deskribí momentunan pasahero. Camille Pissarro i Alfred Sisley a pinta paisahenan, usando téknika di kuashi bibu pa kapta atmósfera i lus. Otro impresionistanan notabel ta inkluí:
- Mary Cassatt: Un ekspatriado merikano konosí pa esenanan doméstiko, trankil i íntimo, di mama i yu.
- Armand Guillaumin: Famoso pa su paisahenan vibrante i riku ku koló, i téknika di kuashi kortiko ku verf diki.
- Gustave Caillebotte: Un realista influensiá pa impresionismo ku a portrètá bista urbano, kayanan i interiornan di Paris.
- Frédéric Bazille: Konosí pa su pinturanan aplika ku téknika di kuashi los di suheton no-tradishonal, figuranan di kampo.
- Eugène Boudin: Un prekursor di impreshonismo, Boudin a kaptura e hemut di playa i haf ku pinturanan suave i atmosfériko.
- Édouard Manet: Ounke e no a eksponé ku e grupo, Manet tabata pionero den temanan moderno i tabatin un influensia profundo riba e impresionistanan.
Karakterístika
editáImpresionistanan a revolushoná pintura dor di kapturá efektonan pasahero di lus i koló a traves di téknikanan inovativo. Nan a pinta den aire liber, trahando pafó pa opservá lus natural direktamente. Usando materialnan portátil, nan por a kompletá nan trabounan lihé, hopi biaha enfatisando velosidat i spontaneidat. En bes di meskla koló riba un palèt, nan a apliká téknika di kuashi, sin meskla, di koló puru, kreando puntonan i strepinan vibrante. Di serka, nan pinturanan tabata parse brutu i fragmentá, pero for di un distansia, e téknika di kuashi tabata meskla den esenanan briante i luminoso. Karakterístikanan klave di impreshonismo ta inkluí:
| Ehemplar | Karakterístika | Deskripshon |
|---|---|---|
 |
Téknika di kuashi kòrtiku i visibel | Téknika di kuashi lòs i kibra ta pone koló, sin mesklá, den kapa pa krea tekstura i moveshon. |
 |
Koló briante i puru | Tononan bibu ku mínimo sombra, a remplasá e tononan morto di pintura tradishonal, hopi biaha ta pone koló komplementario huntu ku otro. |
 |
Komposishon habrí | Ophetonan i figuranan a wòrdu kòrtá òf pòni na ángulonan inusual, kibrando for di simetria klásiko. |
 |
Temanan di tur dia | Klase medio durante tempu liber, hardin, paisahe di stat i bida doméstiko a tuma presedensia riba temanan históriko òf religioso. |
 |
Asimetria | Figuranan i ophetonan hopi biaha tabata for di sentro òf portrètá for di puntonan di bista no-konvenshonal pa krea un sentido di inmediatamente. |
 |
Perspektiva ekspresivo | Puntonan di bista altu òf turdi a wòrdu usá pa mehorá efekto artístiko en bes di atené na proporshon estrikto. |
| Kambio di lus | E mesun esena a wòrdu pinta na diferente ora di dia pa kapta kambionan den lus i atmósfera. | |
 |
Pintamentu pafó | Ta evita idealisashon di tayer pa reflehá e mundu manera e ta berdaderamente, den tempu real. |
Dor di enfoká riba e kalidatnan transitorio di lus i koló, impreshonistanan a trese un vitalidat fresku na pintura, enfatisando impreshonnan visual en general en bes di detayenan presis. Nan obranan a disolvé liñanan, kua figuranan ta meskla den ambientenan luminoso i briante, miéntras ku komposishonnan asimétriko a duna un sentido di spontaneidat paresido na un fotografia instantáneo.
Referensia
|