YHWH

יהוה

Ech Tétragranme (cha vut dire quates lètes in viu grec) ch’est ch’nom Diu dins ch’judaïme, ch’est un nom fort étrange raport eq cha n’est mie fort clair quoé-jou qu’is vultte dire ches quates lètes-lo. Ech nom originnal in ébreu ch’est יהוה qu’o put ertraduire in alfabet latin conme cha : YHWH.

Normalmint, ches Juis is n’dvoétte mie prononcher ch’nom YHWH, quanqu’à l’Sinagogue is diztte el Tora, is diztte Adonaï quanqu’ch’est écrit YHWH. Ch’est l’roaison porquoé qu’o n’sait mie kmint cha s’disoét, os o qu’ches consonnes raport qu’in ébreu o n’écrit mie ches voéïèles.

Os intind perfoés Yahweh conme erconstruccion d’el prononchacion, pi ches témoins Jéhovah is prononchtte YHWH Yéhovah, ch’est d’lo qu’vyint leus nom Jéhovah.

Ches eutes nom à Diu dins ch’Viu Testamint

Diu il o pusiurs noms dins l’Tora pi dins tout chViu Testamint. Conme el Tora ch’est ches saintes Écrivures, ch’est pus important d’erbéïer kmint qu’Diu il est lonmè ddins qu’dins ches eutes lives.

Élohim

אֱלֹהִים

Ech mot Élohim il est souvint ertraduit per Singneur moais cha n’est mie perfoait conme ertraduccion. Ech mot ébreu אֱלֹהִים i donne echl’idèe d’puissanche, pi il est à ch’pluriel. In ébreu, ches mots is ont ch’pluriel in -im souvint. Élohim ch’est ch’pluriel à Éloh obin Èl qui vut djo dire Singneur. Porquoé Élohim et point Éloh, ch’est un mistère eq granmint d’tiologiens is s’sont dmandè. Ech minme problème ed pluriel i s’pose itou por אֲדֹנָי (Adonaï) qu’est un eute nom à Diu pi qui vut dire « mes Moaites » à ch’pluriel. Ch’est itou ch’minme pluriel qu’o put rtruvoér dins l’bouke minme à Diu quanqu’i dit « Nos » per parler d’Li dins chl’eJnèse 3:22 « vlo qu’echl’onme il o dvenu conme un d’Nos-Eutes per el connoéçanche d’ech Byin pi d’ech Mau ».

Por ches tiologiens crétiens, ch’est un indiche por el Révélacion qu’Diu il est trinne, ch’est-à-savoér il est un pi unnike moais in troés personnes (ech Père, ech Fiu pi ch’Saint-Esprit) : el Trinnitè.

Por ches tiologiens juis, ch’est unne forme ed politèche qu’ed mète un mot à ch’pluriel. Ch’est un singne ed respet por ech nom Diu, conme ches Juis os doévtte foaire eslon ch’deusième kmandmint.

Adonaï

אֲדֹנָי

Adonaï (« mes Moaites » in ébreu) ch’est un nom à Diu dins ch’teske ébreu originnal à l’Tora obin ches 5 prunmiers lives à l’Bibe. O put l’truvoér fort souvint, pus souvint qu’Élohim obin qu’ech vrai nom révélè à Diu : YHWH. Ésactmint conme por Élohim, il y o unne controverse tiologike por savoér porquoé qu’ech mot il est à ch’pluriel.