Gòt

Ij gòt a j'ero un-a dël tribù germàniche orientaj, scond ël soe tradission originaria dl' ìsola svedèisa ëd Gotland e la region ëd Götaland. A ondà a son sbarcà an sle còste dël Mar Bàltich e da si a l'han tacà a slarghesse anvers sud conquistand ël popolassion ch'a trovavo. Rivà an contat con ël mond roman, ch'a-j considerava pì vzin ai sit pitòst che ai german, a son aleasse, e a l'ocorensa rusasse, con tanti imperator roman contra vàire popolassion barbàriche. A son dividusse an Visigòt (branch ossidental) e Ostrogòt (branch oriental). Ant ël IV sécol e V sécol a son stèit possà a ossident da j'Unn e - dòp la fin dl'Imperi Roman (476) - a l'han fondà dij divers regn roman-barbàrich: ël regn dij Visigòt, ch'a corëspond sù për giù a la Spagna dël di d'ancheuj, e 'l regn dj'Ostrogòt, ch'a comprendìa l'Italia.