Palass Médici-Riccardi

Palass Médici-Riccardi a resta a Firense, an contrà Cavour 1. A l'é ël prim ëd na serie ëd palass ëd l'Arnassensa fiorentin-a. Michelozzo a l'ha batilo a parte dal 1444 për Còsim ël vej, che an precedensa a l'avìa arfudà ij proget ëd Brunelleschi. Residensa dij Médici fin-a al 1540, ël palass a l'é stàit catà dël 1659 da Francesco Riccardi, ch'a l'ha fàit ëslonghé la fassada d'un ters. La lavorassion grossera dël pian anferior a contrasta con cola dj'àutri doi pian, arvestì ëd pere viaman pi seulie. La fassada a l'é dzortut ritmà an orisontal da dij curnison massiss motobin acentuà. Un curnison ësporzent, a l'antica, a dzormonta l'edifissi. Ij pian superior as carateriso për dle filonghere d'elegante fnestre binele. Ant la cort a l'anterior a l'é piassà la scoltura Orfeo ëd Baccio Bandinelli.