Umbro

Umbro a l'é na marca d'abijament sportiv, dzortut gropà al fótbal, che a l'ha soa sede ant la sità anglèisa 'd Manchester, an Anghiltèra. Ij sò prodòt a son vendù an pì 'd 90 pais ant ël mond e da vàire ani Umbro a l'é l'ùnich sponsor técnich ëd la Football Association e dla FA Cup e an pì a l'é lë sponsor stòrich dla selession ëd fótbal anglèisa. Stòria L'asienda a l'é fondasse dël 1920 a Wimslow, Cheshire, coma Humphrey Brothers Clothing; dël 1924 a l'ha cangià 'l nòm an Umbro che a sarìa peui na contrassion dël nòm dij frèj Humphrey. Dël 1985, an Brasil, Umbro a l'ha presentà soa prima scarpa da fótbal peui butà an comersi doi ani dòp. Umbro, da j'ani '80, a l'ha creà 'n prodòt vreman popolar valadì un tipo special ëd braje con, andrinta, na pràtica binda elàstica. Pensà a l'achit për giughé a balon a son dventà a la fin dj'ani '80, dzortut për ij pì giovo e ij teen agers, un tipo d'abijament da dovré mincadì. Ant j'ani '90 la società a l'é mudasse a Cheadle, ant na neuva sede che as treuva a la periferìa 'd Manchester. Ant l'otóber dël 2007 la società a l'é stàita catà da la Nike për 285 milion ëd sterlin-e, valadì 408 milion d'euro. Prodòt Ancheuj Umbro a fa minca géner d'abijament e acessòri sportiv, ëdcò mude për antrenesse e scarpe. Un passà glorios Fin-a da soa fondassion, Umbro a l'ha creà 'l material sportiv për vàire squadre 'd fótbal. La prima 'd tute a l'é stàita dël 1934 ël Manchester City FC che pròpi col ann-lì a l'ha vagnà la FA CUP. Ant j'ani apress ël lògo d'Umbro a l'é comparì sla maja ëd: Lanerossi Vicenza, Càliari, Flamengo, Lassio, Calcio Lecco, Arsenal, AZ, Club Bolivar, Cruz Azul, Manchester United, Tottenham Hotspur, Chelsea FC, C.A. Independiente, Linfield, Liverpool FC, Aston Villa, Leeds United, Everton FC, Rangers, Deportivo La Coruña, Olympique Lyonnais, Universidad de Chile, Colo-Colo, Santos, Vasco, AFC Ajax, Universitario de Deportes, Liga Deportiva Universitaria, Celta Vigo, FC Twente, Málaga CF, CSKA Mosca, Hajduk Split, Dynamo Mosca, Torpedo Mosca, FC Mosca, West Bromwich Albion, Nottingham Forest, SSC Napoli, Wisła Kraków, Bologna FC 1909, Celtic FC. A l'é 'dcò stàit sponsor ëd l'Inter FC quandi la squadra a l'ha vagnà soe ùltime Cope UEFA dël 1994 e dël 1998. A l'ha peui fàit le maje 'd vàire selession nassionaj coma 'l Brasil che a l'ha vagnà la Copa dël Mond dël 1994, l'Irlanda dël Nòrd ant j'ani 'd George Best, l'Eire, ël Cile, la Scòssia, la Colombia, ël Méssich e la Norvegia. Sò moment pì bel a l'é rivà ai mondiaj anglèis dël 1966 quandi 15 ëd le 16 squadre che a fasìo cola competission a l'avìo na maja Umbro. Ant j'ùltim ani Umbro a l'ha patì la concorensa 'd Nike, Adidas e, dzortut, Puma che con na bon-a strategìa 'd mërcà a l'ha sërnù 'd fé le maje dë squasi tute le selession nassionaj dij pais anté che 'l fótbal a l'é an camin ch'a dventa famos adess. A dispet ëd costa situassion Umbro a fa ancora da sponsor técnich a la selession nassional anglèisa da pì che 50 ani e minca doi ani a crea 'd neuv kit. Ai mondiaj dël 2006 Umbro a l'ha vestì Anghiltèra e Svessia. Sponsor ëd vàire fotbaleur Ancheuj a fan da testimonial për Umbro Deco, Hernan Crespo, Luis García, Míchel Salgado, Alan Shearer, Henrik Larsson, Richard Dunne, Tim Cahill e ij giugador ëd la selession nassional anglèisa Owen e John Terry.