L'Altra Sicilia
L'Altra Sicilia è nu partitu pulìticu (prima era n'assuciazzioni), cu sedi a Bruxelles (Belgiu), ô sirvizziu dî siciliani e di l'emigrati siciliani. Lu prisidenti e funnaturi è Franciscu Pàulu Catania.
Autunumismu e lingua siciliana
canciaN'anticchia di storia: ntô 1946, la Sicilia addivintau la prima Riggiuni Autònuma d'Italia, e li siciliani firmaru nu trattatu cu li taliani ca pirmittìa d'aviri cchiù autunumìa ntô campu amministrativu, pulìticu e suciali, e dunca di fari di li liggi riggiunali pi tanti cosi (n particulari pi lu nzignamentu di li lingui nta li scoli siciliani). Ma lu trattatu d'autunumìa nun fu mai appricatu cumpretamenti.
Oi ci sunnu ancora picciotti siciliani, l'autunumisti, ca vonnu fari appricari cumpretamenti stu trattatu, pirchì sannu ch'è liggìtimu fàrilu appricari e pirchì sannu ch'è l'ùnicu modu pacìficu pi fari arricanùsciri la lingua siciliana e pi fàrila nzignari bonu nta li scoli siciliani, zoè p'ufficializzàrila.
Dû nizziu, L'Altra Sicilia si pusizziona comu nu partitu autunumista e comu tali voli ufficializzari la lingua siciliana. E' pirchissu ca nta lu sò situ internet s'attròvanu tanti ducumenti e artìculi scritti n sicilianu.
Elezzioni
canciaPi l'accasioni di l'elezzioni pulìtichi taliani dû 2006, L'Altra Sicilia, nzèmmula ô muvimentu pulìticu Per Il Sud, prisintau na lista sò, dinuminata "L'Altra Sicilia - per il Sud", nnâ circuscrizzioni Èstiru, ripartizzioni Europa, ca pigghiau chiossai di 10.000 voti, currispunnenti a lu 2,1% di cunzenzi. La lista si prisintau nnâ circuscrizzioni Èstiru puru pi l'elizzioni pulìtichi dû 2008 pigghiannu quasi lu stissu nùmmaru di voti.
Pubbricazzioni bilingui
canciaLu partitu pùbbrica la rivista bimistrali "L'Isola" ntâ quali certiduni artìculi sunnu scritti n sicilianu mentri àutri artìculi sunnu scritti n talianu. L'Altra Sicilia utilizza puru sta rivista bimistrali pi nzignari a li siciliani la storia millinaria dâ Sicilia cu la cultura, li tradizzioni, la lingua, li filòsufi e li ntillittuali, e zoccu la Sicilia rapprisintau pô sviluppu dû mititirràniu.
Pruposta di liggi n favuri di la lingua siciliana
canciaNtô dicèmmiru dû 2006, L'Altra Sicilia hà scrittu la prima pruposta di liggi pi fari arricanùsciri lu sicilianu comu na lingua ufficiali dâ Sicilia (nta nu bilinguismu sicilianu-talianu ufficiali). Li ducumenti pùbbrici avìssiru a èssiri scritti 'n sicilianu e 'n talianu, li nnicazzioni stratali 'n sicilianu e 'n talianu, na radiu-tv riggiunali n sicilianu fussi criata, e la lingua siciliana e àutri materi di civilitati siciliana (storia, littiratura, tiatru, ecc.) fùssiru nzignati ntê scoli di l'ìsula dû suli.