Apollo 7
Apollo 7 (roovvâdmáánu 11.–22. peeivi 1968) lâi vuossâmuš almaidittum mánudâškirdem NASA Apollo-ohjelmist. Taat kirdem piejâi uđđâsist joton kirdemohjelm, mii koskâldittui 21 mánuppajan Apollo 1:ii luhottesvuođâ maŋa. Taan luhottesvuođâst uđđâivemáánu 27. peeivi 1967 jammii kulmâ astronaut rakkeet vyelgimtestaamij ohtâvuođâst. Apollo 7 -kirdem komendeijen tooimâi Walter M. Schirra. Kommandmooduul kirden lâi Donn F. Eisele. Mánudâšmooduul kirden tooimâi R. Walter Cunningham. Missio kontroljuávhu stivrejii kirdemjođetteijeeh Glynn Lunney, Gene Kranz já Gerry Griffin.[1]
Schirra, Eisele já Cunningham lijjii suunâttâllum nube almaidittum mánudâškirdem váldujuávkkun, já sij toimii Apollo 1:ii värijuávkkun.[2] Taan juávhust algâalgâlávt Eisele lâi jurdâččum Apollo 1:ii juávkun Roger Schaffee sajan, mut taah kyevtis lonottáin saje, tastko Eisele lâi lammim uálgátuáivis já tarbâšij čuopâdâs.[1] Apollo 7 kirdeeh testajii ehidist 26.1.1967 siämmáá mooduul ko main Apollo 1:ii kirdeeh parttâšuvvii iđedist čuávuváá peeivi. Áinoo iäruttâssân lâi tot, et ehidist rakkeet uksâ ij lam kiddejum tego čuávuváá iiđeed[3].
Apollo 7 paččui komovuotân roovvâdmáánu 11. peeivi 1968 Cape Canaveralist Floridast pääččimvuáláást 34, já tot maasâi Enâmân Atlant väldimeerân 11 peivid maŋeláá.[1]
Käldeeh
mute- ↑ 1,0 1,1 1,2 Cheryl L. Mansfield: Apollo 7 NASA. 9.1.2018. Čujottum 17.10.2022. (eŋgâlâskielân)
- ↑ NASA Apollo Mission Apollo-1-- BackUp Crew history.nasa.gov. Čujottum 17.10.2022. (eŋgâlâskielân)
- ↑ Astronaut Walt Cunningham sahhiittâllâm