Sämirääđi

Sämirääđi (orjâlâškielân Sámiráđđi, juulevsämikielân Sámeráde, maadâsämikielân Saemienraerie, nuorttâlâškielân Sääʹmsuåvtõs, kieldâsämikielân Са̄мь Соббар já suomâkielân Saamelaisneuvosto) lii sämmilij kulttuurpoolitlâš hiäŋgáámettum oovtâstpargo-orgaan, moos kuleh oovce sämiservid Taažâst, Ruotâst, Suomâst já Ruošâst.

Sämirääđi viste Ucjuuvâst

Historjá

Sämmilij 2. tave-eennâmlâš konferens uásiväldeeh Kárášjuuvâst ive 1956

Rääđi vuáđudui porgemáánu 18. peeivi 1956 sämmilij 2. tave-eennâmlâš konferensist Kárášjuuvâst noomáin Tave-eennâmlâš Sämirääđi. Cuáŋuimáánu 15.–17. peeivij 1957 Anarist rääđi čokkânij vuossâmuu keerdi.

Ive 1992 Helsigist uárnejui sämmilij 15. konferens, kost Ruošâ peln Kuáláduv säämi servi tuhhiittui jesânin já Tave-eennâmlâš Sämirääđi -noomâst kuođđui tave-eennâmlâš meddâl.

Jeessânseervih

Sämirääđist láá tääl kulmâ jeessânseervi Taažâst, kulmâ Ruotâst, ohtâ Suomâst já kyehti Ruošâst ađai ohtsis oovce sämiservid:

Taažâst

• Sämmilij aalmuglitto (SÁL)
• Taažâ puásuisämmilij riijkâservi (NBR)
• Taažâ sämmilij riijkâservi (NSR)

Ruotâst

• Puásuiomâsteijei ohtâvuotâ (BEO)
• Riijkâservi Same Ätnam (RSÄ)
• Ruotâ sämmilij riijkâservi (SSR)

Suomâst

• Suomâ sämmilij kuávdášservi (SSG)

Ruošâst

• Kuáláduv säämi servi (GSS)
• Murmansk kuávlu sämiservi (OOSMO)

Sämirääđi saavâjođetteijeeh

Válduartikkâl: Sämirääđi saavâjođetteijee

Ovdil ive 1980 Tromssaast tollum sämmilij 11. tave-eennâmlâš konferens jyehi staatâst lâi jieijâs juávus já jyehi juáhusist jieijâs saavâjođetteijee, mut ton rääjist puoh juáhusijn lii lamaš ohtâsâš saavâjođetteijee, kii väljejuvvoo ain ihán häävild.

Palhâšumeh

Sämirääđi mieđeet kyehti palhâšume:

• Sämirääđi kirjálâšvuotâpalhâšume
• Sämirääđi kunneepalhâšume

Škovlâláid

• Sämirääđi vuáđudempeivi (18.8.) Kuáti.fi
• Porgemáánu 18. peivi: Sämirääđi vuáđudempeivi Kuáti.fi