Bilirubina

Bilirubina është produkt i metabolizmit të hemit të hemoglobinës. Eritrocitet pas rreth 120 ditë jetë shkatërrohen në sistemin retikuloendotelial, respektivisht në shpretkë. Hemi i liruar me zbërthimin e hemoglobinës shndërrohet në bilirubinë. Rreth 15% e bilirubinës rrjedh nga hemi i liruar për shkak të eritropoezës joefektive, pra si rezultat i pamundësisë së inkorporimit të hemit në globinë në palcën e eshtrave. Një sasi minimale prej më pak se 1% vjen nga hemi i liruar gjatë zbërthimit të enzimeve që përmbajnë hemin në molekulën e tyre si oksidaza e citokromit P 450.