Poapskenbleede

Aan Äntwurf foar ne seelter Foone bruukt tjo Poapskenbleede as Symbol foar do tjo Täärpe. Ju Foone fon dän Seelter Buund häd sogoar soogen deerfon. Do Wäästfräisen hääbe siet sowät 1890 ne Foone mäd soogen Poapskenbleede, do do soogen Seelounde symbolisierje skällen. Do blaue un wiete Boanen sunt dan dät Woater un ju roode Faawe tjut deerap wai, dät do Bleede noch in t Woater uumhooch woakse, also noch jung sunt. Al fuul laanger häd ju Provinz Groningen in hiere Woapen two Fjoondel mäd Poapskenbleede foar fräiske Uumelounde. Die Gebruuk mout oawers al uut fuul allere Tieden stamme, dan in dät ooldhoochdüütske Nibelungeläid wäd boald fon "Heer Walter fon Seelounden", die ne Foone mäd "Seeblätter" hied.

Foone fon dän Seelter Buund.

Ju wäästfräiske Foone.

Woapen fon do Groninger Uumelounde.

Seelter Siegel ätter Sello, mäd fielicht Poapskenbleede in n Bäätergruund.

Woapen mäd Poapskenbleede bie Poute, Tecklenbuurich.

Ju Ferbiendenge mäd Seelterlound lät also modern, man daach rakt et Uumstände, do der uurs wai wiese. In sien Bouk "Saterlands ältere Geschichte und Verfassung" beskrift Georg Sello nämmelk dät Seelter Siegel, dät hie in Lübeck apfuunen hiede. Deerap sjucht hie ju bekoande Figuur, man in ju Bäätergruunde swieuwje litje Dingere (so tou sjoon 12 Stuk), dät kuuden Bloumen weese, man uk Iemen. Ap ju Teekenge deerbie is wääld foar Bloumen, man dät waas goud wan dät noch moal in Lübeck ätterkieked wäide kuude, of dät fielicht daach Poapskenbleede sunt.

• 
  Woapen fon Ait
• 
  Woapen fon dän Loundkring Kloppenbuurich
• 
  Dät Woapen fon ju Provinz Groningen

Woapene uut Tecklenbuurich un dät Uumelound

Noch wät uurs rakt et, dät uk ätter Seelterlound waiwiest. Dät is, dät uk ju Stääd un Groafskup Tecklenbuurich Poapskenbleede in sien Woapen häd. Wie wieten dät Seelterlound tou Tecklenbuurich heerd häd, bit dät him 1400 ounuumen wuude. Me kon sik dan foarstaale, dät do Tecklenbuurger Groafen dät Poapskenblääd fierden uum tou wiesen, dät jo oolde Gjuchte in "Fräislound" hieden. Deerfon häd uk dät Woapen fon ju seelter Noaberstääd Ait sien two Poapskenbleede. Die Ienfloud fon ju oolde Groafskup Tecklenbuurich sjucht me fääre nit bloot in ju Foone un dät Woapen fon dän Loundkring Kloppenbuurich, man uk noch in do Woapene fon dän oolden Loundkring Tecklenbuurich un deeroun do Meenten Ladbergen un Lienen un fon dän näienen Kring Steinfurt un deeroun ju Meente Lotte.

Oolde Woapene

• 
  Woapen fon dän Groaf fon Tecklenbuurich, uum 1200
• 
  Woapen Groafskup Tecklenbuurich ätter 1589
• 
  Oolde Loundkring Tecklenbuurich (bit 1974), häärd nu tou dän Loundkring Steinfurt

Woapen fon däälich

• 
  Dät Woapen fon ju Stääd Tecklenbuurich mäd do Poapskenbleede, do n bitje tou Haate ferteekend sunt
• 
  Loundkring Steinfurt
• 
  Meente Lotte

• 
  Meente Ladbergen
• 
  Meente Lienen

Tecklenbuurich un uur Gebiete

Ieuwenske do Ferbiendengen mäd do Fräislounde bit tou dät Jier 1400 hieden do Tecklenbuurger Beluukengen mäd uur Gebiete un Groafskuppe, so as mäd Bentheim un fääre ätter dät Suude wai. Dät keem truch Hilkeräi un Äärwerai. In 1699 sünt do Groafen fon Tecklenbuurich un Bentheim uutstuurwen un dät Äärwe geen ätter Solms. Dät kon man uk sjoo aan do oolde Woapene, ap do Woapene fon Solms (Hessen) wiese Poapskenbleede ap Ferbiendengen mäd Tecklenbuurich.(Hier läite dät Haate, daach in wäkke allere Bielden sunt dät moor Poapskenbleede).

• 
  Woapen Groaf Arnold IV.(1562-1606) fon Bentheim un Steinfurt, 1589
• 
  Solms-Lich-Hohensolms
• 
  Solms-Hohensolms-Lich
• 
  Solms, 1850