Bungsbierich

Die Bungsbierich (platdüütsk: Bungsbarg, hoochdüütsk: Bungsberg) in ju sonaamde Holstenske Swaits, dät Höäwellound fon Aast-Holsten, is mäd 167,4 m uur NHN ju grootste Hööchte in Släswiek-Holsten.

Glap fon dän Bungsbierich ätter't Noude

Hie äntstuude in ju Saale-Iestied foar sun 150.000 Jiere as Eend-Moräne fon 'n Glitsker. In ju Weichsel-Iestied foar sun 10.000 Jiere kuuden do Glitskere deer nit moor uur kuume un flooten deer an do Sieden uumetou. In düsse Tied waas die Bierich also n sonaamden Nunatak.

Bie dän Bungsbierich lait ju Wälle fon ju (näie) Schwentine, een fon do loangste Äien in Släswiek-Holsten.

Nit ap dän hööchste Punkt, man uk nit fier wäch stoant n grooten Seende-Mäst fon dän NDR un ap ju uur Kaante n Uutsjuchts-Touden, die Elisabeth-Touden uut dät Njuugentienste Jierhunnert.