Cincinnati

Cincinnati
Ienwoonertaal	332.252 (2006)
Lound	Fereende Stoate
Deelstoat:	Ohio
Fläche:	201,9
Websiede:	http://www.cincinnati-oh.gov/

Cincinnati is n Stääd in dät Suudwääste fon dän Stoat Ohio in do Fereende Stoate. Ju Stääd lait an de Ohio-Äi un häd ätter ju Foulkställenge fon 2006 n Ienwoonertaal fon 332.252 binne do Meenteskeede, wiermäd se ju bit ap two grootste Stääd fon Ohio is. Ju Agglomeration, ju sik uutdient uur Deele fon do Stoaten Ohio, Kentucky un Indiana, is oawers fuul gratter un tält bolde 2 millione Ienwoonere.

Ätter dän Bau fon dän Eriekanoal un dän Miamikanoal wuud ju Stääd al bolde n wichtich Zentrum fon ju Skipfoart ap e Ohio-Äi. In dät Jier 1850 hied ju Stääd al 115.000 Ienwoonere un waas deermäd een fon do two grootste Stääde wäästelk fon dät Appalachen-Gebierge.

Geskichte

Ju Stääd wuud 1788 gruunded un 1790 "Cincinnati" naamd ätter ju "Sälskup fon do Cincinnati", n Fereen fon fröiere Offiziere uut dän Amerikoanske Uunouhongegaidsskriech, do ätter dän Kriech ätter hiere Burger-Beroup touräächkeemen wieren. Deermäd foulgeden jo dät Biespil fon dän roomske Diktator Cincinnatus, die der ätter n fon him fierden Kriechstoach fluks wier bääte dän Plouch stounde geen. Foar ju Ouskaffenge fon ju Sklaaweräi waas Cincinnati ne wichtige Twiskestation fon dän Underground Railroad.

Befoulkenge

Sjuch uk: Do Seelter in Cincinnati.

Cincinnati

Fon ju Befoulkenge is 12,3 % aller as 65 Jiere un bestoant foar 42,8 % uut Eenpersonehuushollengen. Ju Oarbaidsloosegaid bedrächt 5,1 % (Foulkställenge 2000).

Sowät 1,3 % fon ju Befoulkenge fon Cincinnati bestoant uut Hispanics un Latinos, 42,9 % is fon afrikoansken Uursproang un 1,5 % fon asiatisken Uursproang.

Die Taal Ienwoonere soank fon 364.553 in 1990 ap 331.285 in 2000.