Aruji Kartawinata
Aruji Kartawinata (éjahan heubeul Arudji Kartawinata, lahir di Garut, 5 Méi 1905 - Jakarta, 13 Juli 1970) nyaéta salah sahiji urut Menteri Muda Pertahanan Indonésia dina Kabinét Sjahrir II. Satamatna ti HIS manéhna neruskeun atikan ka MULO (sakola satingkat SMP) di Bandung. Réngsé ti dinya manéhna digawé jadi guru, tuluy jadi kapala sakola di SD Sarikat Islam di wewengkon Garut. Sajaba ti éta saprak ngora manéhna ogé aktif dina sagala rupa gerakan kabangsaan.
Sabot di Garut, manéhna kungsi medalkeun koran Balatentara Islam anu ngawartakeun kagiatan sarta gerakan Sarikat Islam. Dina jaman pendudukan soldadu Jepang, manéhna miluan latihan PETA (Pembela Tanah Air) sarta diangkat jadi daidancho PETA di Cimahi. Sanggeus kamerdikaan Indonésia, manéhna tuluy diangkat jadi Komandan BKR (Badan Kéamanan Rakyat) anu saterusna jadi TKR (Tentara Kéamanan Rakyat) Divisi III Jawa Kulon sarta mangrupa cikal bakal Divisi Siliwangi.
Sabot Kabinét Syahrir II, manéhna kapeto jadi Menteri Muda Pertahanan. Dina taun 1948, TNI kudu hijrah ka Yogyakarta alatan ayana pajangjian Renville. Manéhna ditunjuk jadi Pupuhu Panitia Hijrah TNI anu miboga pancén mindahkeun soldadu-soldadu Républik Indonésia anu aya di saantéro wewengkon kakawasaan Walanda ka wewengkon Républik.
Sajaba ti éta manéhna kungsi ogé jadi anggota DPR-RIS (Republik Indonésia Serikat). Sanggeus Pemilu 1955, manéhna kapilih jadi anggota DPR-RI. Karirna terus naékjadi anggota DPR-GR sarta tungtungna diangkat jadi anggota DPA (Déwan Pertimbangan Agung) dina taun 1966-1968.
Dina taun 1970, manéhna maot alatan ngarandapan panyakit radang otak sarta dikurebkeun di Taman Makam Pahlawan Kalibata.
Tumbu ka luar
édit- (id) Inohong Sajarah - Aruji Kartawinata Archived 2007-11-07 di Wayback Machine