Mawingu ya Magellan
Mawingu ya Magellan (ing. Magellanic Clouds) ni galaksi mbili ndogo zinazoonekana kama doa angavu angani kwa macho matupu ya watazamaji kwenye angakusi ya Dunia. Hazionekani kwenye nusutufe ya kaskazini ya Dunia.
Mawingu ya Magellan ni sehemu ya kundi janibu la galaksi yakizunguka Njia Nyeupe. Hayana umbo maalum. Yanaitwa
- Wingu Kubwa la Magellan (Large Magellanic Cloud - LMC) lina umbali wa miakanuru 170,000 kutoka kwetu na idadi ya nyota zake ni takriban bilioni 15. Linaonekana kwenye mpaka wa makundinyota ya Panji (Dorado) na Meza (Mensa).
- Wingu Dogo la Magellan (Small Magellanic Cloud - SMC) lina umbali wa miakanuru 200,000 kutoka kwetu na idadi ya nyota zake ni takriban bilioni 5. Linaonekana kwenye mpaka wa makundinyota ya Tukani (Tucana) na Nyoka Maji (Hydrus).
Mawingu hayo yalijulikana tangu kale kati ya mataifa ya nusutufe ya kusini na kupokea majina. Ushuhuda wa kwanza wa kimaandishi upo katika kitabu cha mwanaastronomia Al Sufi juu ya nyota kilichotungwa mnamo mwaka 964 BK. Mzungu wa kwanza aliyeyaeleza alikuwa Ferdinand Magellan alipozunguka Dunia kwenye mwaka 1519.
Katika darubini, mawingu hayo yanaonekana kama galaksi yenye nyota, nebula na mafungunyota ndani yake.