بی آر چوپڑہ

بالی وڈ فلم انڈسٹری کے نامور فلمساز اور ہدایت کار ہیں جو ہندوستانی فلمی صنعت میں وہ ایک ستون مانے جاتے تھے۔ ہمہ جہت شخصیت کے مالک بلدیو جنہیں انڈسٹری بی آر کے نام سے جانتی ہے، عام روش سے ہٹ کر فلمیں بنانے کے لیے مشہور تھے۔

بی آر چوپڑہ
معلومات شخصیت
پیدائش	22 اپریل 1914ء   لدھیانہ
وفات	5 نومبر 2008ء (94 سال)  ممبئی
شہریت	بھارت (1947–) برطانوی ہند (–1947) ڈومنین بھارت (15 اگست 1947–26 جنوری 1950)
اولاد	روی چوپڑہ
بہن/بھائی	یش چوپڑا
عملی زندگی
مادر علمی	جامعہ پنجاب
پیشہ	فلم ساز ،  فلم ہدایت کار ،  منظر نویس ،  اداکار
اعزازات
فلم فیئر اعزاز برائے بہترین ہدایت کار (برائے:Kanoon ) (1962) دادا صاحب پھالکے ایوارڈ    پدم بھوشن
	IMDB پر صفحات

ابتدائی زندگی

بلدیو راج چوپڑہ 1914ء میں شہر لدھیانہ میں پیدا ہوئے تھے۔ انھوں نے لاہور یونیورسٹی سے انگریزی لٹریچر میں ایم اے کیا لیکن تقسیم ملک کے بعد وہ دہلی منتقل ہوئے اور بعد میں ممبئی آ گئے۔ بی آر چوپڑا نے بحثیت فلم ساز 1946ء میں کلکتہ میں فلم چاندنی چوک بنائی۔ اس فلم میں مسٹر ہانڈا نے بھی سرمایہ کاری کی تھی اور ان کا نام بھی فلمسا ز کے طور پر آیا تھا۔۔ چاندنی چوک قیام پاکستان کے بعد ۔۔ دیوانے دو کے نام سے سینما گھروں کی زینت بنی تھی۔۔( دیوانے دو) نعیم ہاشمی کی پہلی فلم تھی اور اس فلم کے ہیرو نعیم ہاشمی اور ہیروئن۔۔ اریکا تھیں۔۔ اریکا نے بعد میں رخشی کے نام سے پاکستان کی بے شمار فلموں میں اداکاری کی۔ وہ ایک اچھی رقاصہ تھیں۔ نعیم ہاشی کی اس پہلی فلم کے ہدایت کار ٹھاکر ہمت سنگھ۔۔ موسیقار جی اے چشتی اور شاعر اور رائٹر سیف الدین سیف تھے

فلمی زندگی

انھوں نے فلمی دنیا میں اپنا سفر فلمی صحافی کے طور پر شروع کیا لیکن بعد میں 1955ء میں اپنی فلم کمپنی بی آر فلمز کے نام سے شروع کی۔ انھوں نے 1978ء میں بنی فلم ’گھر‘ میں اداکاری کی۔ ان کی ہدایت اور پروڈکشن میں کئی کامیاب فلمیں بنی ہیں جن میں قابل ذکر فلمیں ’نکاح‘، ’انصاف کا ترازو‘، ’پتی پتنی اور وہ‘، ’ہمراز‘، ’گمراہ‘، ’سادھنا‘ اور ’قانون‘ ہیں۔ اس میں سے ہر ایک فلم سماج کے سلگتے مسئلہ پر مبنی تھی۔

معاشرتی موضوعات پر فلمیں

ان کی فلم ’نیا دور‘ اپنے وقت کی کامیاب ترین فلم ثابت ہوئی لیکن اس کا موضوع اس وقت کی فلموں کی روش سے بالکل مختلف تھا۔ نئے مشینی دور میں مزدور اور مالک کا رشتہ۔ فلم ’نکاح‘ میں انھوں نے مسلم سماج میں طلاق جیسے حساس موضوع کو خوبصورتی کے ساتھ اجاگر کرنے کی کوشش کی تھی۔ وہیں ’گمراہ‘ میں شوہر کے ساتھ بے وفائی ’انصاف کے ترازو‘ میں کمسن لڑکی کی عصمت دری ’سادھنا‘ میں ایک طوائف کی داستان پیش کی تھی اور یہ ساری فلمیں اپنے وقت کی کامیاب ترین فلمیں ثابت ہوئیں۔

آخری فلم

کافی عمر ہوجانے کے باوجود ان کے حوصلے پست نہیں ہوئے تھے انھوں نے اپنی عمر کے تجربے کو اپنے قلم کے ذریعہ دنیا کے سامنے رکھنے کی ایک کوشش فلم ’باغبان‘ میں کی۔ فلم کی کہانی تین پیڑھیوں کے گرد گھومتی ہے۔امیتابھ بچن اور ہیما مالنی کی اداکاری والی اس فلم نے دنیا کے سامنے اس سچائی کو رکھا جسے دیکھ کر ہر کسی نے سمجھا کہ کہیں یہ کہانی اس کی کسی اپنے کی تو نہیں ہے۔

متنوع شخصیت

بی آر کو متنوع شخصیت کا مالک کہا جا سکتا ہے۔ انھوں نے فلم کے تقریباً ہر شعبہ میں طبع آزمائی کی۔ انھوں نے اگر فلمیں بنانا شروع کیں تو کچھ فلموں کی ہدایت بھی دی۔ فلموں کی کہانیاں بھی لکھیں اور فلم میں اداکاری بھی کی۔

اعزازات

بی آر کو ان کی خدمات کے صلے میں کئی ایوارڈ بھی ملے۔1998ء میں فلم انڈسٹری کا سب سے بڑا ایوارڈ دادا صاحب پھالکے ایوارڈ انھیں دیا گیا۔ فلم فیئر نے ان کی خدمات کے عوض انھیں فلم فیئر لائف ٹائم اچیومینٹ ایوارڈ سے نوازا۔ 1960ء میں بنی ان کی فلم ’قانون‘ میں فلم فیئر نے انھیں بہترین ہدایت کار کا ایوارڈ دیا۔

خاندان

بی آر کے بیٹے روی چوپڑا آج ایک کامیاب فلمساز ہیں ان کے بیٹے بھی اب فلمسازی کے میدان میں قدم رکھ چکے ہیں۔ بی آر کے بھائی یش چوپڑہ انڈسٹری کے مانے ہوئے فلمساز ہیں جنھوں نے کئی کامیاب فلمیں انڈسٹری کو دیں اور اب ان کے بیٹے آدتیہ چوپڑا بھی اس میدان میں ہیں۔

انتقال

94 سال کی عمر میں 5 نومبر 2008ء کو ان کا انتقال ہوا۔