Juto:Qualità dei testi
- Ajuto
Tuti i testi cargai sul Wikisource veneto i xe classificà secondo un sistema de qualità, che dà informassion sul stato de ogni testo par jutarne a mejorar senpre più la nostra biblioteca.
Tre carateristiche xe fondamentali:
La fonte: intanto i testi i dovarìa vegner senpre da na fonte sèrta e atendibile. La roba mejo de tuti xe de verghe le scansioni de l'opera originale, e averle cargà su Commons e aver creà un indice qua su Wikisource, da cui se pol trascrìvar el testo. Quando questo no xe possibile, va ben anca doparar come fonte un'opera cartacea che gavì a casa o che catè in biblioteca, opure un sito internet. Se la fonte la xe un'opera cartacea, se gà da indicar i dati de l'edission tolta come riferimento (editor, sità, ano de publicassion, eventualmente nome del curatore...); se la xe un sito internet, el gà da essar un sito considerà afidabile. Se gnanca questo no xe possibile, parché de molti testi no esiste na edission cartacea, se pol publicar istesso el testo, ma vegnarà fora un messajo par avisar i utenti che la fonte no xe afidabile e quindi el testo el podarìa contegner dei erori.
La conpletessa: i testi i dovarìa senpre essar trascriti par intiero. Tochi e tochetini i xe senpre mejo de gnente, ma molto mejo xe verghe el testo conpleto.
La riletura: sicome semo tuti umani e sbaliemo assè, i testi dotà de scansioni secondo la procedura proofread i vien sotoposti a un sistema de riletura e controli incrociai, dove più utenti difarenti i rivarda el stesso testo e i corège eventuali erori de trascrission. Sui testi de cui no gavemo le scansioni no se pol far sto procedimento; eco parché se racomanda de cargar possibilmente le scansioni.
I quatro livèi de qualità
canbiaIn breve, i quatro livèi i xe sti qua de soto.
Testi inconpleti: el testo nol xe stà gnancora trascrito par intiero.
Testi da sistemar: el testo el xe conpleto, ma el gà ancora qualcossa da sistemar, par esenpio la fonte no xe afidabile.
Testi conpleti: el testo xe stà trascrito par intiero, la fonte la xe indicà coretamente e la xe afidabile. El xe el massimo livèl a cui pol rivar i testi sensa scansion
Testi rileti: el testo, oltre a essar conpleto e con fonte afidabile, el xe stà rileto da un utente difarente da quelo che gà cargà el testo. Solo i testi con scansion i pol rivar qua.
Qualità dei testi e qualità de le pagine
canbiaPar i testi con scansion, la qualità del testo la xe diretamente ligà a la qualità de le singole pagine del namespace Pagina. Quindi el testo el se pol segnar come trascrito solo se tute le pagine che lo conpone le xe stà trascrite; el se pol segnar come rileto solo se tute le pagine che lo conpone le xe stà rilete, e cussì via.