Alasald

Alasald (ven.: Ни́жняя Салда́) om Venäman lidn Sverdlovskan agjan päivlaskmas. Se om Alasaldan lidnümbrikon administrativine keskuz.

Alasald
Нижняя Салда

Lidnanznam	Flag
Valdkund	Venäma
Eläjiden lugu (2021)	17,229 ristitud
Pind	30 km²
Pämez'	Andrei Matveev (keväz'ku 2020—)
Telefonkod	+7−34 345-xx-xxx
Avtokod	66, 96, 196
Aigvö	UTC+5 (MSK+2)

Istorii

Ende mansin žilo oli lidnan territorijal. Nügüdläižen eländpunktan aluz om pandud vl 1760 (vai 1758 — vanhuskolaižiden časoun') kuti Nikita Demidovan raudantegim i žilo senno Sald-jogen randal. Žilon eläjad oliba sirdanuzikš mehikš Alalidnan, Kazanin i Arhangel'skan gubernijoišpäi. Vll 1851−1858 lattihe Venäman ezmäižiden raudterel'soiden pästandad. Vspäi 1938 Alasald om lidnan statusanke. Saubatihe raudan metallurgijan päčid 1970-nzil vozil.

Alasald šingotase vanundantegimel (raudasižed aluižed da ladlused rel'soiden alle), Mašiništonsauvomižen tedoinstitutal da sen tehmižel (vitkod raketlikutimed i hapanik), mugažo mecan ümbriradmižel pilindmaterialoikš.

Geografijan andmused

Lidn sijadase Sald-jogen randoil (ven.: Салда 122 km pitte, Tagilan oiged ližajogi, Obinjogen hurapol'ne bassein), 175 m ü.m.t. keskmäižel korktusel. Uit-vezivaradim om saudud ülezjogen, sijadase lidnan suves. Matkad Jekaterinburghasai om 137 km suvhe orhal, 185 km avtotedme vai raudtedme. Lähembaine lidn om Üläsald vides kilometras päivlaskmha-suvipäivlaskmha orhal, avtol i raudtel.

Alasald-raudtestancii om lidnan pohjoižpäivnouzmas. Elektrojonused ühtenzoittas lidnad Alatagilanke 45 km suvipäivlaskmha i Alapajevskanke 60 km suvipäivnouzmha.

Tobmuz

Kaik nell' pen't žilod mülüdas lidnümbrikho Alasaldan ližaks. Lidnümbrikon pind — 590,8 km².

Edeline lidnümbrikon pämez' om Jelena Matvejeva (keväz'ku 2012 — viluku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 17 619 ristitud, lidnümbrikon — 17 939 ristitud. Vl 2017 kaik 17 380 ristitud elihe lidnas i 17 672 ristitud kaikes lidnümbrikos. Kaikiš suremb lidnan ristitišt oli 20..22 tuhad eläjid vozil 1959−1992 (22 000 rist. vl 1967).

Rahvahad (ozutadud rahvahudenke vl 2010): venälaižed — 94,2 %, totarlaižed — 1,1 %, toižed rahvahad — 4,7 %.

Ortodoksižen hristanuskondan koume pühäpertid ratas lidnas: ph. Mikulai-čudonsädajan jumalanpert' (om saudud vll 1810−1834), ph. Aleksandr Nevalaižen jumalanpert' (1905), Jumalanmaman «Spravitai»-jumalaižen pühäpert'-časoun' (2013).

Alatagilan kaivuzmetallurgižen kolledžan filial om lidnan professionaližen opendusen aluzkundaks.

Galerei

• 
  Ph. Aleksandr Nevalaižen jumalanpert', vn 2019 nägu
• 
  Ph. Mikulai-čudonsädajan jumalanpert', vn 2017 nägu
• 
  Kul'turkeskuz (2019)

Irdkosketused

• Alasaldan lidnümbrikon Duman oficialine sait (duma-nsalda.ru). (ven.)
• Alasaldan lidnümbrikon Administracijan oficialine sait (nsaldago.ru). (ven.)