Barabinsk

Barabinsk (ven.: Бара́бинск, sibirin totaran kelel: Көгүтей-тура) om Venäman lidn da lidnankund Novosibirskan agjan päivlaskmaižen palan keskuses. Se om Barabinskan rajonan administrativine keskuz.

Barabinsk
Барабинск

Lidnanznam	Flag
Valdkund	Venäma
Eläjiden lugu (2021)	27,648 ristitud
Pind	69,48 km²
Pämez'	Roman Bobrov (tal'vku 2017—)
Telefonkod	+7−38 361-xx-xxx
Avtokod	54, 154
Aigvö	UTC+7 (MSK+4)

Istorii

Eländpunktan aluz om pandud vl 1893 žiloks raudtestancijanno sauvomha da holitamha Transsib-raudted. Vl 1917 anttihe žilole lidnan statusad.

Barabinsk šingotase raudten edheotandoil (koume vedimdepod i vagonoiden kohenduzdepo, raudten distancii), «Sibpromsväz'»-tegimel (konstrukcijad i materialad sauvomha joksuzoigendamižpirdoid) i sömtegimištol (oluden i leibän edheotandad, maidtegim, kalankazvatuz, kombisötken tegim).

Geografijan andmused

Lidn sijadase Päivlaskmaižen Sibirin tazangišton Barabinskan alangištos, 115 m ü.m.t. keskmäižel korktusel. Nell' järved om lidnan pohjoižpäivnouzmaižel röunal.

Matkad Novosibirskaspäi om 293 km päivlaskmha orhal, 315 km avtol vai raudtedme. Lähembaine lidn om Kuibišev kuz' kilometrad pohjoižhe orhal, raudtel (ajelemha jüguid vaiše) vai avtotedme.

Tobmuz

Barabinsk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan pämez' om Maksim Ovsännikov, radoi vn 2017 kül'mkuhusai. Lidnan Deputatoiden nevondkundan ezimez' om Sergei Ivanov vn 2016 redukuspäi. Edeline nevondkundan ezimez' om Aleksandr Kibal'nikov, radoi vn 2016 redukuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 30 394 ristitud, rajonan kaks' koumandest, vn 2021 — 27 648 ristitud. Kaik 29 122 eläjad oli lidnas vl 2017. Kaikiš suremb ristitišt oli 36..40 tuh. eläjid vll 1959−2001 (40 878 eläjad vl 1959).

Ortodoksižen hristanuskondan nell' pühäpertid oma avaitud lidnas: Jumalanmaman «Kaikiden gorähižiden ilo»-jumalaižen pühäpert' (om pühästadud vl 1998 Jumalanmaman Katken pühäpertikš), puine phh. Petran da Fevronijan jumalanpert' (vspäi 2017), ph. Jurgii-vägestusenkandajan jumalanpert' (vspäi 1997) kaumžomal i časoun'.

Lapsiden opendusen aluzkundad oma kahesa päivkodid (nomer 1..8), viž keskškolad (nomer 1, 2, 47, 92, 93), licei, Venäman raudteiden škol-internat nomer 18, muzikškol, lapsiden da norišton sportškol. Barabinskan medicinine kolledž i Novosibirskan agjan kul'turan da čomamahtoiden kolledžan filial oma lidnan professionaližen opendusen aluzkundoikš.

Galerei

• 
  Jumalanmaman «Kaikiden gorähižiden ilo»-jumalaižen pühäpert', vn 2016 nägu
• 
  Puruvedim-muštnik (2013)
• 
  Barabinsk-päraudtestancijan sauvuz vl 2008

Irdkosketused

• Lidnan tobmuden aluzkundoiden oficialine sait (barabinsk.nso.ru). (ven.)