Dakk

Dakk (beng.: ঢাকা [ɖʱaka]) om Bangladešan pälidn (vspäi 1971) da kaikiš suremb lidn.

Dakk
ঢাকা
(Dhaka)

Valdkund	Bangladeš
Eläjiden lugu (2016)	14,543,124 ristitud
Pind	306,38 km²
Pämez'	Džamal' Mustafa (tal'vku 2018—) Mohammad Sajid Hokon (semendku 2015—)
Telefonkod	+880−02
Aigvö	UTC+6

Pälidnan sijaduz valdkundas (vn 2014 kart)

Istorii

Eländpunktan aluz om pandud 7. voz'sadal. Se oli Bengalijan pälidnaks vll 1608−1717.

Dakk šingotase tekstilin fabrikoil, farmaceftižel sarakol, maižandusen produkcijan ümbriradajal tegimištol (džut, ris), banksarakol i konsaltingal, järed jogiport radab.

Sadek Hussein Hoka oli ranu lidnan 2. pämehen (2002−2011). Vn 2011 tal'vkuspäi Dakk om jagatud kahthe municipaližhe ühtnikha: pohjoine (angl. Dhaka North City Corporation) i suvine (angl. Dhaka South City Corporation), kaikuččes ičeze pämez' radab.

Geografijan andmused

Lidnan kart (2020)

Lidn sijadase Gangan del'tan Burigang-hijaman hural randal, 60 m ü.m.t. keskmäižel korktusel.

Klimat om tropine räk da upehtoitai, pil'vekaz vodes läbi. Voden keskmäine lämuz om +26,0 C°, keväz'kun-redukun +26,4..+29,1 C°, vilukun +18,4 C°. Ekstremumad oma +5,6 C° (viluku) i +42,3 C° (sulaku). Il'man lämuz voib ülitada +31 C° miččel taht kul, ei voi lanktas madalamb mi +21 C° kezakus-sügüz'kus. Paneb sadegid 1990 mm vodes, enamba semendkus-sügüz'kus (272..391 mm kus), kuiv sezon oleskeleb kül'mkus-uhokus (60 mm pordos). Kun keskmäine relätivine nepsuz vajehtase 62..73 % röunoiš kül'mkus-sulakus, 82..83 % kezakus-sügüz'kus.

Eläjad

Vl 2005 Dakkan eläjiden lugu oli 9 724 976 ristitud. Läz 20 mln elädas ezilidnoidenke vl 2018, ristitišt ližadub lidnan röunoiden levitandal i eläjiden migracijal kaiken valdkundan külätahoišpäi.

Kaik 52 üläopendusen aluzkundad om avaitud lidnas.

Transport

Municipaližed avtobusad, dizel'jonused, velo- da avtorikšad oma kundaližeks transportaks lidnas. Kamalapur om lidnan znamasine päraudtestancii. Kebnan metropolitenan ezmäine jono om sauvomas vspäi 2016.

Rahvahidenkeskeine soda- da civiline Hazrat Šahdžalal-lendimport (DAC / VGHS, 11,5 mln passažiroid vl 2018) sijadase 17 km lidnan keskuzpalaspäi Dakkan pohjoižes. Tehtas reisid Indijha, araban mirun maihe, Suvipäivnouzmaižen Azijan i Keskuzazijan maihe, mugažo järedoihe lidnoihe mail'madme.

Galerei

• 
  Päiduz Dakkas (2014)
• 
  Kreskent-järv lidnanpirdas (2014)
• 
  Ziaurah Rahmanan mavzolei (2014)
• 
  Bangladešan Rahvahaline Suim (2014)
• 
  Üks' sildoišpäi vl 2014

Irdkosketused

• Pohjoižen Dakkan tobmuden sait (dncc.gov.bd). (beng.) (angl.)
• Suvižen Dakkan tobmuden sait (dhakasouthcity.gov.bd). (beng.) (angl.)