Maskat

Maskat (arab.: مَسْقَط Maskaṭ [ˈmasqatˤ]) om Omanan pälidn da kaikiš suremb lidn. Se om ühtennimižen agjan administrativižeks keskuseks mugažo. Maskat om meriport Omanan lahten randal.

Maskat
مسقط
(Maskat)

Flag
Valdkund	Oman
Eläjiden lugu (2017)	1,720,000 ristitud
Pind	3,797 km²
Telefonkod	+968
Aigvö	UTC+4

Lidnan nägu Man kaimdajaspäi vl 2002

Istorii

Torguindmeriport om tetab 1. voz'sadaspäi meiden erad. Erazvuiččil pordoil mülüi Persijan i Ottomanan imperijoihe, oli Portugalijan i Suren Britanijan kolonijan palaks.

Maskat šingotase tervhudenkaičendan kompleksoil, torguindan sijaližil kompanijoil, järedal meriportal i kivivoil.

Geografijan andmused

Maskatan agjan sijaduz valdkundas vn 2016 kartal

Lidn sijadase Arabijan pol'sarel, valdkundan pohjoižpäivnouzmaižel mererandal, 69 m ü.m.t. keskmäižel korktusel. Lidnfartaloiden territorii — 273,9 km².

Klimat om tropine letetazangišton, räk kuiv, päivoikaz vodes läbi. Voden keskmäine lämuz om +28,6 C°, sulakun-redukun +29,7..+35,2 C°, tal'vkun-uhokun +21,3..+22,6 C°. Ekstremumad oma +1,6 C° (viluku) i +49,2 C° (heinku, eloku). Kezaaigan minimum om +21,3 C° (eloku), tal'vaigan maksimum om +38,5 C° (uhoku). Il'man lämuz voib ületada +34 C° joga kul, ei voi olda madalamb mi +19 C° kezakus-sügüz'kus. Paneb sadegid 100 mm vodes, enamba tal'vkus-sulakus (13..24 mm kus), sezon sadegoita oleskeleb kezakus-redukus (koume millimetrad pordos). Kun keskmäine relätivine nepsuz vajehtase 42..49 % röunoiš sulakus-kezakus, 55..67 % toižiš kuiš.

Maskatan agj jagase kudeks provincijaks (vilajetaks).

Eläjad

Vn 2015 semendkus lidnan eläjiden lugu oli 1 288 330 ristitud, valdkundan koumandez. Kaikiš suremb lidnan ristitišt om nügüd'. 17. voz'sadaspäi se ližadub znamasižes märas Indijan i Pakistanan eläjil, hö ratas inžiniringan kompanijoiš, sauvondsarakos i torguindas.

Päuskond om islam. Toižile religijoile voib panda pühäpertid (induizm, hristanuskond), no ei sa lugeta pühäpaginoid toižiš sijiš.

Galerei

• 
  Vanh lidn (2006)
• 
  Maskatan Verajiden muzei (2010)
• 
  Kunigahan operan sauvusen südäimes, vn 2014 nägu
• 
  Viktorijan mererandišt Kabus-sultanan portas (2012)
• 
  Rahvahidenkeskeižen lendimportan ühthine nägu vl 2014

Irdkosketused

• Lidnan municipalitetan oficialine sait (mm.gov.om). (arab.) (angl.)