Sojärven rajon

Sojärven rajon (venäkelel: Суоярвский район, suom.: Suojärven piiri) om municipaline ühtnik Karjalan Tazovaldkundas, Venälaižes Federacijas.

Sojärven rajon
Суоярвский район (ven.)
Suojärven piiri (suom.)

Valdkund	Venäma
Administrativine keskuz	Sojärv (lidn)
Eläjiden lugu (2016)	16,594 ristitud
Pind	13,731 km²

Administrativine keskuz om Sojärv-lidn. Siš eläb rajonan ristitišton viž ühesandest.

Istorii

Rajon om sädud vn 1940 heinkus enččel Suomenman territorijal, sidä anttihe Tal'vsodan jäl'ghe. Sojärv-žilo kändihe lidnaks da rajonan keskuseks.

Vozil 1941−1944 Suomenman sodaväged oliba rajonas.

Vspäi 1957 enččen Petrovskan rajonan territorii om jagadud Sojärven da Kondopogan rajoniden keskes. Vl 1964 andoihe Veškelican küläkundad rajonha Änižröunan rajonaspäi. Vl 1982 sijatihe Gumarinon küläkundad rajonha Medvežjegorskan rajonaspäi.

Geografijan andmused

Sojärven rajon om Karjalan Tazovaldkundan suvipäivlaskmaine taho. Pind — 13 731 nellikkilometrad (koumanz' sija tazovaldkundas 18:späi).

Om röunoid 6 Karjalan Tazovaldkundan rajonanke da Suomenmanke:

• päivnouzmmas Kondopogan rajonanke;
• suvipäivnouzmas Präžan rahvahaliženke rajonanke;
• suvipäivlaskmas Pit'krandan i Sortavalan rajonidenke;
• päivlaskmas Suomenman Pohjoižkarjal-agjanke;
• pohjoižes Mujezerskijan rajonanke;
• pohjoižpäivnouzmas Medvežjegorskan rajonanke.

Kaik om 1800 järved da 490 pen't joged rajonan territorijas. Joged mülüdas Atlantižen valdmeren basseinha. Znamasižed järved oma Sojärv (58,6 km²), Salonjärv (46 km²) da Loimolanjärv (20,7 km²).

Londuseližed varad oma turbaz, nikel', sauvondmaterialad (ozrikkivi, rusked mramor, gabrodiabaz, saved, letked, gravii), pirit, mec, kala, reskvezi.

Vspäi 2005 rajonan territorii alajagase 5 municipaližhe ühtnikha: 1 lidnankund da 4 küläkundad.

Eläjad

Vn 2002 Venäman rahvahanlugemižen mödhe eläjiden lugu oli 24 028 ristitud, vl 2010 — 18 814 ristitud.

Kaik om 27 eländpunktad rajonas (vl 2005), sidä kesken 1 lidn, 18 külänvuittušt žilod, 2 raudtestancijad kaikenaigaiženke ristitištonke da 6 küläd.

Toižed sured eländpunktad oma Porosjärv-žilo (2,6 tuh. rist. vl 2013) da Naistenjärv-žilo (1,2 tuh. rist. vl 2013).

Irdkosketused

• Sojärven rajonan oficialine sait (suojarvi.ru). (venäkelel)
• Sojärven rajon Karjalan Tazovaldkundan oficialižel gov.karelia.ru-saital. (venäkelel)