Abdulino

Abdulino (ven.: Абду́лино) om Venäman lidn Orenburgan agjan lodehes. Se om Abdulinon lidnümbrikon (1785 km², edel 2016. vot nimitihe rajonaks) administrativižeks keskuseks da palaks.

Abdulino
Абдулино

Lidnanznam	Flag
Valdkund	Venäma
Eläjiden lugu (2021)	17,274 ristitud
Pind	47 km²
Pämez'	Denis Pavlov (sügüz'ku 2020—)
Telefonkod	+7−35 355-xx-xxx
Avtokod	56
Aigvö	UTC+5 (MSK+2)

Enzne i nügüd'

Eläbzoittud Abdulovankülä (ven.: деревня Абдулова) mainitase ezmäižen kerdan vodel 1795. Vodespäi 1811 nimitase nügüdläižikš. Vodel 1888 raudte tuli lidnha, ühtennimine Abdulino-raudtestancii radab «Samar — Uf»-jonol. Vodel 1895 «Перов и Зуев»-kompanii sauvoi tegint ümbriradamha grečad surimeks. Vodelpäi 1923 Abdulino om lidnan statusanke.

Nügüd'aigan lidn om maižanduzrajonan keskuz. Leibänkombinat da maidkombinat oma saudud, om raudten holitišen edheotandoid, sauvondmaterialiden tehmine (metallvanundtegesed — metalližed lavad, laudad i profil'lehtesed aidoiden täht, saiding). Kivivoin da londuseližen gazan löudmižsijad oma ottud kävutamižhe läz lidnad.

Geografijan andmused

Lidn sijadase Tiris-jogen randoil (ven.: Тирис 46 km pitte, Ik-jogen bassein), Uralan ezimägištol, 190 m keskmäižel korktusel valdmeren pindan päl.

Matkad Orenburghasai om 280 km suvipäivnouzmha «Kazan' — Orenburg»-avtotedme (R239), röunhasai Baškortostananke — nell' kilometrad pohjoižpäivnouzmha lidnaspäi. Avtote om lidnan päivnouzmaižeks röunaks. Lähembaižed lidnad oma Buguruslan 80 km päivlaskmha orhal vai sada kilometrad avtotel, Belebei (Baškortostan) 55 km pohjoižpäivnouzmha orhal vai 70 km avtol.

Tobmuz

Kaik 48 žilod da küläd mülüdas lidnümbrikho Abdulinon ližaks.

Lidnümbrikon tobmuden pämez' om sen Administracijan pämez'. Edeline lidnümbrikon pämez' om Vladimir Naseikin (viluku 2016 — tal'vku 2019).

Eläjad

Voden 2010 Venäman rahvahanlugemižen mödhe lidnan eläjiden lugu oli 20 173 ristitud, vn 2021 — 17 274 ristitud, ümbrikon seičeme kümnendest. Kaik 19 222 eläjad oli lidnas vl 2017. Kaikiš suremb lidnan ristitišt oli 29 976 eläjad vl 1959.

Ortodoksižen hristanuskondan kuz' pühäpertid oma kaičenus i saudud lidnas: koume jumalanpertid i koume časounäd. Jumalanpertid oma Hristan Eläbzdusen (vspäi 1946), ph. Oleg Bränskalaižen (om letud vl 2006), ph. Aleksandr Nevalaižen (saudihe vll 2010−2011).

Lapsiden opendusen aluzkundad oma viž nimitadud i nomeruidud päivkodid (nomer 1..4, 7), nell' keskškolad (nomer 1, 3, 38, 87), gimnazii nomer 1, licei, lapsiden sädamižen keskuz, čomamahtoiden škol G.A. Vavilovan nimed, ümbrikon sportškol. Buguruslanan kivivoin kolledžan Abdulinon filial om lidnan professionaližen opendusen aluzkundaks.

Galerei

• 
  L-klassan puruvedim-muštnik päraudtestancijanno (2021)
• 
  Avtobusstancii i «Ekspress»-torguindkeskuz vl 2007
• 
  Abdulino-päraudtestancijan sauvuz vl 2009

Irdkosketused

• Abdulino-lidnümbrikon oficialine sait (mo-ab.orb.ru). (ven.)