Apatitad

Apatitad (ven.: Апатиты [əpɐˈtʲitɨ]) om Venäman lidn Murmanskan agjan keskuzpalas. Se om agjan kahtenz' lidn eläjiden lugun mödhe, Apatitoiden lidnümbrikon administrativine keskuz da pala.

Apatitad
Апатиты

Lidnanznam	Flag
Valdkund	Venäma
Eläjiden lugu (2023)	48,748 ristitud
Pind	37,5 km²
Pämez'	Svetlana Katel'nikova (reduku 2021—)
Telefonkod	+7−81 555-xx-xxx
Avtokod	51
Aigvö	UTC+3 (MSK+0)

Lidn om Edahaižen Pohjoižen tedokeskuz mail'man znamoičendanke. Venäman Tedoakademijan Kolan tedokeskusen kahesa institutad ühesaspäi da kaks' tedoiduzkeskust sijadasoiš Apatitoiš.

Istorii

Eländpunktan aluz om pandud vl 1926 kuti pen' Apatitad-žilo seičemenke eläjanke. Vl 1935 ühtištadihe sidä Belii-raudtestancijanke (vspäi 1916, nüg. Apatitad I-stancii) i «Industrii»-sovhozan žilonke (oli olmas vspäi 1930), kätihe Apatitad-radnikžiloks šingotamha apatitkivendon löudmižsijad, se om kaikiš suremb mail'mas tähäsai. Ühtištadihe radnikžilod lähiženke lidnanvuiččenke Molodöžnii-žilonke (5980 rist. vl 1959) da anttihe lidnan statusad vn 1966 7. päiväl heinkud.

Apatitad-lidnan tegimišton päsarakod oma apatitkoncentratan pästand i nefelinan erigoitmine sijaližes kivendospäi, sauvondmaterialiden tehmine (raudbetontegesed), sömtegimišt, lämuden i elektrusen tehmine. Apatitoiden lämuzelektrostancii kävutab kivihil't.

Geografijan andmused

Lidnümbrikon sijaduz agjas vn 2011 kartal

Lidn sijadase kukhikahas tahondas, Ekostrovskai Imandr-järven (351 km²) päivnouzmaižel randpolel, 129..278 m korktusil, 178 m ü.m.t. keskmäižel korktusel.

Matkad Murmanskhasai om 157 km pohjoižhe raudtedme vai «Kol»-avtotedme. Lähembaine lidn om Kirovsk vižtoštkümnes kilometras päivnouzmha avtotedme.

Tobmuz

Tiklaht-kezažilo i Hibinad-raudtestancii kaikenaigaižeta ristitištota mülüdas lidnümbrikho Apatitoiden ližaks. Lidnümbrikon pind om 2 500 nellikkilometrad.

Municipaližen ühtnikan pämez' om sen Deputatoiden nevondkundan ezimez'. Edeline nevondkundan ezimez' om Aleksei Gilärov (kezaku 2015 — sügüz'ku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 59 672 ristitud, lidnümbrikon — 59 674 ristitud, vn 2021 lidnan — 49 647 ristitud. Kaik 56 356 ristitud eliba lidnas vl 2017. Kaikiš suremb lidnan ristitišt oli 88 026 eläjad vl 1989.

Rahvahad (enamba 0,4 % vl 2010): venälaižed — 84,0 %, ukrainalaižed — 2,5 %, vaugedvenälaižed — 1,6 %, totarlaižed — 0,5 %, azerbaidžanlaižed — 0,4 %, toižed rahvahad — 2,1 %, rahvahuden ozutandata — 8,9 %.

Hristanuskondan viž pühäperid oma saudud lidnas: ortodoksižen hristanuskondan koume jumalanpertid i baptizman kaks' jumalanpertid.

Professionaližen opendusen aluzkundad oma Apatitoiden politehnine kolledž, Kolan medicinine kolledž, Murmanskan kahten universitetan filialad.

Transport

Avtobusad da maršruttaksid oma kundaližeks transportaks lidnas. Koume raudtestancijad da platform oma saudud.

Tatanmaine civiline Hibinad-lendimport (KVK / АПХ / ULMK, 60,1 tuhad passažiroid vl 2017) sijadase kaks'toštkümnes kilometras suvhe lidnaspäi. Tehtas reisid Piterihe, Moskvha i Čerepovecan lendimporthasai, mugažo sezonreisid Mustmeren lebutahoiže.

Galerei

• 
  Lidnümbrikon administracijan sauvuz (2014)
• 
  Venäman uziden moknikoiden da hengenavaidamižen kundlijoiden jumalanpert' (ortodoksine hristanuskond), vn 2014 nägu
• 
  VTA:n Kolan tedokeskusen Geologjan institut vl 2016
• 
  Sauvojiden kul'turkeskuz (2014)
• 
  Apatitad-1-päraudtestancii vl 2014
• 
  Kahtenz' apatit-nefelinine küllästamižtegim (ven.: АНОФ-2), vn 2008 heinkun nägu

Irdkosketused

• Lidnümbrikon tobmuden sait (apatity.gov-murman.ru). (ven.)