Sorsk

Sorsk (ven.: Сорск, hak.: Сорығ) om Venäman lidn da lidnümbrik Hakasijan Tazovaldkundan keskuzpalan pohjoižes.

Sorsk
Сорск (ven.)
Сорығ (hak.)

Lidnanznam	Flag
Valdkund	Venäma
Eläjiden lugu (2021)	10,124 ristitud
Pind	70 km²
Pämez'	Marina Gurai (sügüz'ku 2024—)
Telefonkod	+7−39 033−2x-xxx, +7−39 032−3x-xxx
Avtokod	19
Aigvö	UTC+7 (MSK+4)

Istorii

Eländpunktan aluz om pandud 1940-nzil vozil kuti Sor-žilo (ven.: Сора) samha molibdenad. Nimitihe jogen mödhe, šorijalaižiden nimituz libub siš-žo sanantüvespäi. Vn 1954 31. päiväspäi tal'vkud sen nimi oli Dzeržinskii-radnikžilo. Vn 1966 15. päiväl sügüz'kud žilo sai lidnan statusad udenke nügüdläiženke nimenke.

Sorskan znamasižed edheotandad oma molibdenan i vas'ken küllästamižfabrik sijaližel torhudel, ferromolibdenantegim da avtošinoiden ümbriradmižtegim hahktinan pästandanke.

Geografijan andmused

Lidn sijadase Sor-jogen randal (ven.: Сора, Jenisein hurapol'ne bassein), Kuzneckan Alataun ezimägištol, 750 m ü.m.t. keskmäižel korktusel.

Matkad Abakanhasai i Černogorskhasai om 84 km suvipäivnouzmha orhal vai 110 km avtotedme. Erbinskai-raudtestancii (ven.: Ербинская, vspäi 1914) sijadase kudes kilometras suvipäivnouzmha lidnan keskusespäi «Ačinsk — Abakan»-raudtejonol.

Tobmuz

Erbinskai-žilo raudtestancijanno (800 rist. vl 2010), Koltarov-aal i Sorskii podhoz-žilo (molembad seištas kaikenaigaižeta ristitištota) mülüdas lidnümbrikho Sorskan ližaks. Lidnümbrikon pind — 1323,2 km².

Lidnümbrikon tobmuden pämez' om sen Administracijan pämez'. Edeline Administracijan pämez' om Vladimir Naidönov (sügüz'ku 2014 — sügüz'ku 2024). Lidnümbrikon Deputatoiden nevondkundan ezimez' om Galina Veselova vn 2022 redukuspäi. Edeline nevondkundan ezimez' om Marina Savel'jeva (reduku 2017 — reduku 2022).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 12 143 ristitud, vn 2021 — 10 124 ristitud (alištadud eländpunktoidenke — 11 023 ristitud). Kaik 11 514 eläjad oli lidnas vl 2017. Kaikiš suremb lidnan ristitišt oli 15 600 eläjad vl 1996.

Rahvahad: venälaižed — 89,15 %, hakaslaižed — 5,95 %, ukrainalaižed — 1,10 %, toižed rahvahad — 3,80 %.

Ortodoksižen hristanuskondan uz' Jumalanmaman Kazanin jumalaižen jumalanpert' om sauvomas vspäi 2008.

Lapsiden opendusen aluzkundad oma nell' päivkodid, kaks' aluzškolad (nomer 2 Sorskas i nomer 4 Erbinskai-stancijal), kaks' keskškolad (nomer 1 i 3), muzikškol, noriden tehnikanradajiden stancii, sportškol, suks'baz. Professionaližen opendusen aluzkundad ratas lähembaižiš lidnoiš.

Irdkosketused

• Lidnan tobmuden sait (sorsk-adm.ru). (ven.)