Pieter Pepers

Pieter Pepers (Brugge 10 oktober 1730 - Brugge 28 juni 1785) was e West-Vlamsche beeldouwer.

Pompe ip den Eiermarkt in Brugge deur Pieter Pepers (1761)

Beeldje van Maria met kiend vo d'Onze-Lieve-Vrouwekerke in Brugge

Leven

Pieter Pepers gienk noa d’academie van Brugge, woa dat ‘n lêerlienk was van de beeldouwer Pieter Van Walleghem (1697-1776). Van 1751 tout 1759 gienkt ’n noa d’academie van Parys en je volgde lesse in 't atelier van René-Michel Slodtz. Je kêerdege ton were noa Brugge en je weundege doa in de Smeestroate. Je kwam in conflict me d'ambachtn moa je was populair in kerkelyke kriengn. Den êestn april 1761 is z’n zeune Pieter Junior geboorn die ook beeldouwer gewordn is. († 10 september 1794)

Werk

• 1761: De monumentoale pompe ip den Eiermarkt van Brugge. Van boovn stoat er e lêeuw en e beir met e woapnschild.
• 1765: De beeldn van den Èilign Petrus en Paulus (2,25 meter grôot), die sedert 1970 in ‘t plantsoen van de Sint-Salvatorskathedroale van Brugge stoan, an de kant van de Stêenstroate. Den ipdrachtgever was bisschop Joannes Robertus Caïmo, die deur Pepers vêertien beeldn liet moakn vor in den hof van ’t kastêel van Rooigem in Sinte-Kruus. (De bisscop die voor hem seer genegen was heeft hem doen maecken twee colossaele beelden van HH Petrus en Paulus om die te stellen in den hof van sijn kasteel, ligghende ter prochie van sinte Cruys, eertijds genaemt het Casteel van Royeghem). Loater en de beeldn ook nog een ende ip ‘t binnenpling van ‘t bisschoppelik paleis gestoan.
• 1767: ’t Standbeeld van den Èilign Nepomucenus ip de Nepomucenusbrugge (vroeger d’Eeckhoutbrugge) an den Dyver in Brugge en 't beeld van Johannes den Doper.
• 1768: De beeldngroep Samson en de lêeuw (kastêel van Rooigem).
• 1770: De beeldngroep Christus die de sleutels gift an Sinte-Pieter ounder de prikstoel in de Sint-Bartholomeuskerke van Geroardsbergn.
• 1776: Beeldje van Maria en kiend in de Sint-Salvatorskathedroale van Brugge. E kopie d’rvan stoat buutn vo d’Onze-Lieve-Vrouwekerke.
• De twi knielende iengels in de boovnkapelle van ’t Eilig Bloed.
• Je zoudt ook e cupido gemakt en in marmer vo Madame de Pompadour.

Pieter Pepers is, tegoare me Hendrik Pulinx, de mêest gekende Brugsche beeldouwer van de achttienste êeuwe.

Ofbeeldiengn die ier by passn ku je vien in de categorie Pieter Pepers van Wikimedia Commons.