Wim Opbrouck

Dit artikel es geschreevn in 't Kortryks, en da zou best ozô bluuvn.

Wim Opbrouck (5 februoari 1969) is ne West-Vlamschn zanger en acteur die ipgegroeid es in Oarelbeke, moa in Boavekove weunt.

't Es moeilik om Wim Ipbrouck in en vakske te steekn: ie ziengt, ie speelt covers, j'es acteur zowel in films, tv lik in theoater, moa je makt ôok geweune tv-programma's. Zyn grôotste verwezenlikkiengn zyn:

'De Dolfijntjes' en 'TV-tunes KNT', zyn covergroepke woamee dat ie iptrêedt in de culturele centra en ip festivollekes
Zyn rolln in films lik 'Manneken Pis' en 'Ad Fundum'
Tv-rolln in 'In de gloria', 'Het Eiland', 'Windkracht 10'. J'èit ôok ne roadshow 'De Bende van Wim', woarin dat ie me Jean Blaute en Michiel Hendryckx ip de moto deur Europa trekt.
Theoater activiteitn: je speeldige by de "Blauwe Maandagcompagnie" in "Ten Oorlog" en wos lid van de vastn artistiekn kern van "Het Toneelhuis"

Vôder skildert ie nu en ton een skilderytje of têkent ie een têkeniengkse.

Van West-Vlams standpunt ut is Wim et best bekend van zyn rolle ols Gerrit Callewaert ut Boavekove (dêelgemêente van Oarelbeke) in 'In de gloria'. In die rolle kwamt'ie iedre weke kloagn dat'ie 't en "echte skande" vond da West-Vloamiengn ondertiteld weirdn in tv-programma's. Vaneigens wos t'ie zelve ôok ondertiteld, omdat'ie zelve West-Vlams klaptige, wa dat ton weer anleidienge gaf vô nieuwe klachtn enzovôors.

Der is ôok ne gekende sketch (ut 'Alles kan beter') woarin dat ie computerlessn gift in 't West-Vlams. Daarut zyn de legendoarische termen gelik 'kêrekêwere' (backspace), 'arde ploate' (hard disk), 'zochte ploate' (floppy) en 'rute 98' (Windows 98) vôortgekoomn.

Externe koppeliengn

Ofbeeldiengn die ier by passn ku je vien in de categorie Wim Opbrouck van Wikimedia Commons.