Halloween

Halloween is e fêestdag die den 31sten oktober gevierd wordt.

Oorsproung

Me spreekn van duuzndn joarn geleen. Ton was 't 'n Europeesche en heidense fêeste. 't Was de vierienge van 't ende van den oogst en ook e vruchtboareidsfêeste.

De noame Halloween is e verbasterienge van 't Iengelsche all hallow's eve, de vooroavnd van Allerillign. De Keltn vierdn de dag vor Allerillign Samhain, den dag dan de dooie werekeerdn. De Christelikke lêer èt da loater overgepakt.

Overgewoaid nor Amerika

In den tyd dan de Iern en Schottn nor Amerika uutwêekn paktn z'under fêeste mee no doa. Ze gebruuktn ton roapn of bêetn. D'Amerikoann en da loater veranderd. In plekke van roapn en bêetn begostn ze doa pompoenn te gebruukn. En de Keltische offers veranderdn in trick or treat. De joungns goan ton verklid goan ziengn vo snoep, lik dan ze dat ier mè Sinte-Moartn nog ip sommigte plekkn doen mè lanteirns gemakt van bêetn met e luchtje of keirse d'r in.

Weregewoaid

Ip 't ende van de twientigste eeuwe is 't ton were van Amerika overgewoaid nor Europa. De pompoenkwêek is ier ton enorm omoge gegoan.

En 't ziet er nie noar uut da 't gauwe were go verdwynn. De wienkels profiteern van de stille periode tusschn 'were no 't schole' en 'Sint-Nikloai'. De schooln doen d'r ook an mee en de joungns begunn veel tuug te koopn vor under te verkleen. Oe meer dan ze makoar kunn benauwd moakn oe liever. En deur d'interesse vo heidense ritueeln begunn d'r ook veel jounge gastn no midzomer-en midwienterfeestn te goan.

Halloween is dus nie ollêne e kwestje van commerce, mo kan ook gezelligeid briengn ip e moment dat 't vroeg dounker is.

Mêer ofbeeldiengn die ier by passn ku je vien ip Halloween ip Wikimedia Commons.