Lodewyk II van Hongareye

Lodewyk II, (Hongoars: II. Lajos) (Buda (e stik van Budapest), 1 juli 1506 - Mohács, 29 ogustus 1526) was de latste keunienk van Boheemn, Hongareye en Krowoatië van 't Huus Jagiello en ridder van de Orde van et Gulden Vlies.

Je was de zeune van keunienk Vladislav II van Boheemn en Hongareye, en zyn derde vrouwe Anne van Foix. In 1516, je was tien joar oud, stierf zyn voader en keizer Maximiliaan van Ôostnryk kwam zyn voogd.

Zyn trouw

In 1515 was Maximiliaan van Ôostnryk in Weenn tegoare gekommn me keunienk Vladislav II en zyn broere Sigismund I van Pooln vo 't huwelik t'arrangeern tusschn de twi klêenkienders van Maximiliaan (Ferdinand en Maria), me d'ênigste kienders van Vladislav (Anna van Boheemn en Lodewyk).

De doar ofgesprookn dubbele trouwfêeste giengt deure ip 22 juli 1515 in de Stephansdom in Weenn en wierd de Wiener Doppelhochzeit genoemd, te zien ip 'n houtsnede deur Albrecht Dürer. Maximiliaan was platsvervanger vo zyn klêenzeune Ferdinand, die zelve nie anwezig was.

't Dubbel huwelik zorgde der vôorn dat Hongareye en Boheemn elf joar loater ook by 't Huus Habsburg kwoamn.

Zyn dôod

De 29stn ogustus 1526 sneuvelde Lodewyk II in de Slag by Mohács teegn sultan Süleyman I de Grôotn van 't Ottomoans Ryk. J'haad allêne 'n ounwettige zeune, János Wass, van vo dat ie getrouwd was. Ferdinand I wierd verkoozn als zyn ipvolger in Boheemn en Hongareye, mo d'Hongoarsche trône wierd betwist deur Janós Szapolyai.

Achter vele conflictn wierd Hongareye in 1541 ipgesplitst in drie stikkn. Ferdinand I krêeg allêne et keunienklik Hongareye, et nôordwestelik stik van Hongareye da nie in handn van de Turkn was. János Zápolya krêeg Transsylvanië, en 't derde stik gieng no Süleyman zelve ounder de noame Ottomoans Hongareye.

Lodewyk zyn weeuwe, Maria van Hongareye, wierd loater deur heur broere keizer Karel V angesteld als landvoogdesse van de Nederlandn.

Houtsnede deur Albrecht Dürer van de Wiener Doppelhochzeit. Van lienks: Maximiliaan I; zyn klêendochter Maria mè Lodewyk II; Vladislav II mè zyn dochter Anna en zyn broere Sigismund I

Van lienks no reks. Boovn:Maximiliaan I, Filips de Schôonn, Maria van Bourgondië. Ounder: Ferdinand I, Karel V en Lodewyk II .

Ofbeeldiengn die ier by passn ku je vien in de categorie Louis II of Hungary van Wikimedia Commons.