Lodewyk V van West-Francië

Lodewyk V, bygenoamd den Doeniet (in 't Frans: "le Fainéant") (ca. 967 - Senlis, 21 meie 987), van de familie van de Karoliengers, was keunienk van West-Francië van 986 tout 987. Je krêeg zyn bynoame (in 't Latyn "qui nihil fecit" — "die nietnt dêe") verzekers omdat 'n mor e joar regeerde. Je stierf zounder jounges en je was de latste Karoliengsche keunienk.

Lodewyk was den oudste zeune van keunienk Lotharius en Emma van Italië, dochter van Lotharius II van Italië (of van Arles) en Adelaide van Bourgondië.

Zyn kort leevn

Lodewyk was nog styf jounk ost ie ip 8 juni 979 in d'abdye Saint-Corneille van Compiègne deur eirtsbisschop Adalberon gekrôond wierd tout keunienk.

Da kwam deurda zyn nounkel Karel van Neder-Lotharingen zyn moeder in 977 beschuldigde van overspel met den bisschop van Laon. Uut schrik dan z'heur zeune ounwettig zoun verkloarn en dat ie loater gin keunienk zou kunn zyn, kost ze gedoan krygn van heur vint da Lodewyk co-keunienk kwam. Mo je krêeg mo de feitelyke macht achter 'n dôod van zyn voader in 986. Lodewyk beschuldigde zyn moeder en den eirtsbisschop nu dan ze zyn voader zoun vergiftigd hen.

Lodewyk trouwde in 't joar 982 met Adelaïde-Blanche van Anjou, dochter van Fulco II van Anjou, in Brioude (tusschn Clermont-Ferrand en le Puy), woa dan ze tegoare gekrôond wierdn tout keunienk en keuniginne van Aquitanië. Lodewyk was ton nog mo 15 joar oud en zy was ter ol mêer of 40. 't Was heur derde huwelyk en achter e joar woarn z'ol geschid.

Lodewyk haad et conflict g'erfd tusschn de Karoliengers en 't Huus van de Rôoms-Duutsche keizer Otto I, die ols verdediger van Rome de macht haad vo de gêestelykn te benoemn. J'haad Adalberon benoemd tout eirtsbisschop van Reims wa dat hem vele macht gaf. Je was ook eirtskanselier van Lodewyk en zyn voader. Ounder Lotharius had Adalberon probeern te bemiddeln tusschn de twi Huuzn, mo da liep slicht of. Adalberon, die ofstamde van 't Huus Wigerichn of Ardenn-Verdun van Lotharingen trok partye vo d'Ottoonn en Lotharius probeerdeg' hem in 986 te beschuldign van hoogverroad.

Lodewyk was mo twientig joar oud ost 'n stierf achter 'n accident me zyn peird, binst dat 'n an 't joagn was. Deurdat ie gin jounges haad ha zyn nounkel Karel van Neder-Lotharingen nu normoal recht ip de Fransche krône.

Mor Adalberon en Gerbert van Aurillac kwoamn tegoare in Senlis en ze koozn Hugo Capet ols ipvolger.

Ofbeeldiengn die ier by passn ku je vien in de categorie Louis V le Fainéant van Wikimedia Commons.