Veneto

Veneto
Liggienge van Veneto in Itoalië
Hoofdstad	Venetië
Ippervlak	18.345,35 km²
Inweuners Bevolkiengsdichtheid	4.905.200 (2018) 267,38 inw./km²
President	Luca Zaia (LV–LN)
Provinsjes	6 + 1 metropolitoane stad
Gemêentn	571
Website	regione.veneto.it
{{{foto}}} {{{byschrift}}}

Veneto es e regio in't nôord'n van Itoalië mè en ippervlak van 18.345,35 vierkante kilomèiters en juuste gin vuuf miljoen inweuners. D'n ôofdstad es Venetië.

Veneto grenst in't nôord'n an d'ottonome regio Trentino-Zuud-Tirol en vor en klêen stik an Ôostnryk (mêer bepoald de dêelstoatn Tirol en Karinthië), in't ôostn an Friuli-Venezia Giulia, in't zuud'n an Emilia-Romagna en in't westn an Lombardeye. O d'ôostkantn van Veneto ligt d'n Golf van Venetië, e stik van d'Adrioatische Zêe.

Landschap

Ôogtekoarte van Veneto

In't nôordn (meer bepoald in 't stik da teegn Zuud-Tirol en Ôostnryk ligt) es Veneto vrêe bergachtig en liggn der bergn van de Dolomietn en de Karnische Alpn. 't Es ôok ier da Cortina d'Ampezzo ligt, wa vrêe gekend es by alpinistn, skiërs en coureurs. D'n mêest gekendn berg ier es de Tre Cime di Lavaredo die ip't schêe'n me Trentino-Zuud-Tirol ligt.

D'andre stikkn van binn'nland van Veneto liggn in e loagvlakte. Ier liggn ôok teffrente grôote steed'n lyk Verona en Padua en zyn der teffrente boereveldn woar der ounder and're vele wyn wordt verbouwd. De loagvlakte wordt o de zuudkantn van Padua en Vicenza ounderbrookn deur de klêendere euvelruggn van de Monti Berici en de Colli Euganei.

't Grotste gedêelte van de kust es ingevuld deur de laguun'n in de Golf van Venetië en de delta-moundienge van de Po-riviere. D'n ôofdstad Venetië es gebouwd ip êenigte eylandn in de grôotste lagune: de Laguna Veneta. An de kuste van de nôordôostnkantn van de regio kun je mêer zandstrand'n vind'n; ier liggn ôok voakbezochte toeristische badploatsn lyk Jesolo, Bibione en Caorle.

Administratieve indêelienge

De regio Veneto es ingedêeld in 6 provinsjes en 1 metropolitoane stad:

Provinsjes van Veneto

Provinsje	Ofkortienge	Oofdstad	Belangryke plekk'n
Belluno	BL	Belluno	Feltre, Cortina d'Ampezzo
Padua	PD	Padua	Cittadella, Monselice
Rovigo	RO	Rovigo	Adria
Treviso	TV	Treviso	Conegliano, Vittorio Veneto
Venetië (metropolitoane stad)	VE	Venetië	Chioggia, San Donà di Piave, Jesolo, Portogruaro
Verona	VR	Verona	Legnago
Vicenza	VI	Vicenza	Bassano del Grappa

Ofbeeldiengn die ier by passn ku je vien in de categorie Veneto van Wikimedia Commons.