Vlasvienke

Ryk:	Animalia (Bêestn)
Stamme:	Chordata (Chordabêestn)
Klasse:	Aves (Veugels)
Orde:	Passeriformes (Zangveugels)
Familie:	Fringillidae (Vienkachtign)
Geslacht:	Chloris

Sôorte

Chloris chloris
Linnaeus, 1758

Vlasvienkn (Chloris chloris of Carduelis chloris, groenling in 't Nederlands) zyn e sôorte van veugels uut de familie van de vienkn. 't Is êen van de mêest verspreide veugels van Vloanderen (up de zeevnste plekke voogns Natuurpunt [1]), mo de mêeste menschn kunn ze ollêne mo beisn de wienter zien, a't er nie vele gin teetn en is.

Beschryvienge

Vlasvienkn zyn e sôorte van vienkn die groene van kleur zyn (de noame in 't Nederlands toogt dadde: groenling, in 't Iengels is 't greenfinch). Van grotte zyn ze à peu près 't zeste lik musschn of geweune vienkn, e cantimeiter of 15. 't Is surtout nunder gilf-groenn buuk die upvolt, voun de reste zyn ze oek nog dêels groene (kop en rik), grysde (kop, koakn, vlerkn en steirt) en zwort (vlerkn en steirt) ekleurd. Nundern bek is roaze, juuste lik nunder pôotn, z'hen oek nog gilve plekkn an nunder vlerkn.

De puppn zyn oek groene, mo ze zyn matter van kleur. Voun de reste zyn der gin verschilln.

Leefomgevienge en verspreidienge

Verspreidienge van de vlasvienke (groene = hêel 't joar).

Vlasvienkn zittn e bitje overol, surtout round stikkn en wêen met busseltjes en houtkantn round, an 'n bôord van busschn, mor oek in stadsparkn en in hovetjes.

't Zyn veugels die verre in hêel Europa zittn (zest toet in 't nôordn van Nôorweegn), buutn Ysland, de Faroer, Centroal-Scandinoavië en Karelië. Doabuutn zittn ze oek nog in Nôord-Afrika (Marokko, Algereye en Tunesië) en Azië (Turkeye, Syrië, Libanon, Israël, Iran en Irak en Jordanië in de wienter). 't Is oek nog en aparte populoasje in Centroal-Azië (Afghanistan, Tadjikistan en Kirgizië). Doabuutn zyn ze oek nog hier en doar uutezet en broedn ze nu oek (Australië, Nieuw-Zêeland, de Canarische Eilandn en round de Rio Grande (Uruguay, Argentinië).

Vôortplantienge

In april leggn de wuvetjes en ei of zesse in e nest van taksjes, ges en wortels, up en hogte van 1 toet 20 meiter. 't Wuvetje broedt der maximum 2 weekn up, oundertusschn krygt ze teetn van 't vintje. An de joungn uutekommn zyn, toune geevn d'ouders olletwee teetn, surtout beiers en zoad van wiet.

Externe koppelienge

Mêer ofbeeldiengn die ier by passn ku je vien ip Chloris chloris ip Wikimedia Commons.