Vükiped Volapükik äprimon tü 2004, yanula d. 27id; atimo pabevobons is yegeds 39,271. (Yegeds mödik pejafons medü nünömaprogram itjäfidik)
Yeged adelo pevälöl
Elaf Omeisaurus (siämü „läsar di Omei“) äbinon dinosaur lurooda: Sauropoda, kel älifon finü Yurat uto, kö atimo topon Tsyinän. Nem onik dekömon de Bel: Emei, kö pätüvon. Äs els Sauropoda votik, el Omeisaurus äbinon planifidaf gretik. Ärivon lunoti metas 10-15, geiloti metas 4 e vetoti tounas 4. Älabon koapi bigöfik e särvigi lunik patedikis dinosauras votik lurooda at. Distü els Sauropoda mödik ye älabon nudahogis nilü tipot nuda okik. Bäk ela Omeisaurus äbinon geilikum pö hips ka pö jots okiks. El Omeisaurus älabon noe särvigi lunik, abi särvigavirebis pluik anik no ädabinöls pö els Sauropoda votik. Virebs it äbinons lunikums e gretikums.
Jeps gretik ela Omeisaurus ba äzitevons in länäd fina Yurata, kobü elafs Stegosauridae Yuratik soäs elaf Tuojiangosaurus ed elaf Chungkingosaurus. El Omeisaurus äbinon luveratiko limaf mödikün lurooda: Sauropoda in Tsyinän ettimik.
Elaf Omeisaurus päbepenon balidnaedo ün 1939. Pänemon stimü bel saludik: Omeshian, kö fösil balid ela Omeisaurus pitüvon. Bomems mödikün ela Omeisaurus pätuvons ün degyels: 1970 e 1980, dü „dinosauriyag Tsyinänik gretik“. Jünu penemons bids lul ela Omeisaurus: O. junghsiensis, O. changshouensis, O. fuxiensis, O. tianfuensis e O. luoquanensis. Valikafs pänemons stimü tops, kö pätuvons. El O. fuxiensis äbinon bid smalikün, lunotü mets 9,1. Dinosaur teik labü särvig lunikum äbinon elaf Mamenchisaurus. Göbafösil pätüvöl ko fösils ela Omeisaurus in bomabed ot pälelogon as dutöl lü dinosaur at, ab anu kredoy, das duton lü elaf Shunosaurus.
Bomems ela Omeisaurus pajonons in Dinosauramused di Zigong, in provin: Sichuan, ed in Museum di Beipei, nilü Chongqing (tops bofik in Tsyinän). (Yeged lölik...)
Magod avigo pevälöl
Vög Volapüka binon gased Volapükik teik nog papüböl (pefünon fa hiel Ralph Midgley: guvan Volapükanefa). Hiel Ralph Midgley (Greta-Britän) äpreparom segivotis balid gaseda okik finü yel: 1989, ab nomöfiko, efe almuliko, äpubon te sis yel: 1990 (yelod balid). Dü yel bal püba tiäd gaseda äbinon: “Pened Komunik Volapükaflenes Valöpo”. Reidans anik älecedons tiädi somik nejöniki, kludo ün yel: 1991 pivotükon ad “Flenef Bevünetik Volapüka” (ko donatiäd: “Sirkülapenäd ad Volapükanef”, latikumo: “Sirkülapenäd lü Volapükaflens valöpo”) ma nem kluba, kel i pifünon fa ‘Ralph Midgley’. Ün yel: 2004 redakan it telidnaedo äfeablunedom gasedi, efe atna ad “Vög Volapüka” (nem at jünu pagebon).
...das Volapükamuf äninädon vomis jäfedik, soäsä jiel Henriette Wolter, kel päcälof fa Schleyer as cif balid pro Nolüda-Deutän, jiel Marie Johanna Verbrugh, kel älautof tidodemi gretik Volapüka pro Nedänans äsi penädis votik mödik, jiel Maria Tommasi, kel ädunof otosi pro Litaliyänans, u jiel Anna Petersen, kel ävedof presidan balid Volapükakluba di Thoreby (Danän) timü fün onik? (Ekö! lised jivolapükanas famik.)
