Årdene nonnrece (diyalectolodjeye)
L' Årdene nonnrece, po les foclorisses et les diyalectolodjisses do walon, c' est l' Nonne di l' Årdene. Les accints walons d' avår la sont des cis del Basse Årdene.
I comprind :
- li payis del Basse Simwès, dj' ô bén li pårteye walone des comenes di Bouyon et Vresse
- les "hôteurs" : grands bans di Bive et Djedene
- Li payis do dzeu di l' Aiwe di Lesse : rebanêyes comenes di Palijhoû, Libin et Dåvdisse
On î radjoute voltî li comene di Bietris, k' est ddja ene miete so les aschates walon gåmès.
Sol Walonreye di France, les comenes come Arniye sont-st a rindjî avou l' Årdene nonnrece. Fumwè fwait l' pont avou l' Coûtchant walon eyet li tchampnwès.
L' Årdene nonnrece ni comprind nén li Tchestrolès.
L' atuze di l' Årdene nonnrece (e francès Ardenne méridionale) vént des foclorisses, copurade Théodule Delogne, k' î ramexhna ene peclêye di fåves do vî vî tins.
Tant k' ås accints walons d' avår la, il ont stî studyîs di Lucyin Mahin. Å cmince, i loma cisse sitindêye la : "Payis d' ersè", a cåze del piceure idintitaire do mot "ersè". I rashonna ene cåkêye di dnêyes sol motlî walon d' avår la dins li Båze di dnêyes di l' Årdene nonnrece, mins ki dmora on brouyon. I prezinta ene abayeye come cwè l' unité di cisse contrêye la, åd fwait do walon, provént des limodjes di l' ancyin dweyenî d' Graide.