Cawete -ire

Li cawete -ire, c' est ene cawete ki si stitche so on no. Ele rote come li sfwaite cawete do francès "-ière" (ki s' prononce "-iêr"). Ele provént del cawete latene "-aria". Elle egzistêye e walon dispu 1100.

Li cawete -ire si rescontere eto bråmint dins les nos d' plaeces del Walonreye.

Li cawete -ire est l' minme, fonolodjicmint, ki l' coron di sacwants ptits mots foirt corants come bire, pire, evnd.

Li dispårdaedje del cawete -ire emey les accints do walon, c' est so ene pådje tote seule.

Valixhances del cawete -ire

Come sustantif, ele dene li plaece la k' ene plante crexhe :

• canadire
• côrire
• sapinire
• tchenvire

Eto, li plaece la k' on saetche ene sacwè foû d' tere :

• cårire
• såvnire
• mårlire
• schayire
• minire

Dins des mots foirt corants, ele pout djouwer come no d' fijheu.

• loumire : çou ki loume.
• aloumire : çou k' aloume.
• foumire : çou ki foume.

U l' moumint k' on fwait l' accion :

• prandjire

Mins kécfeye, li bodje n' est nén clair :

• poûssire
• manire

Come no u addjectif, c' est ene dobe rifondowe del cawete -ûle :

• påjhire

Vicansté del cawete -ire

Li cawete -ire, c' est ene vicante cawete, k' a siervou a fé des noûmots.

• Tot rwalonijhant on sfwait mot do francès : sapinire, Wikt:plombire.
• Po des tchamps d' coûteure, askepieye sol bodje walon : canadire (après 1650), cawoutire (1995)