Rinne-magrite

Li rinne-magrite, u grande magrite des tchamps u magrite Sint-Djan cåye di Sint-Djhan, c’ est ene grande blanke fleur des tchamps, foirt corante e l’ Walonreye.

Sincieus no d' l' indje : Leucanthemum vulgare (Chrysanthemum leucanthemum)

Famile : stoelacêyes

Li grande magrite des cortis (Leucanthemum maximum), c' est l' minme fleur a pus grand.

Crexhaedje

C' est ene plante ki rvént tos ls ans dins les hourleas, les tchamps, les trîxhes, les waides.

Ele florit do moes d' may å moes d' awousse, al Sint-Djhan e l' Hôte Årdene (did la ses nos «fleur di Sint-Djhan», «cåye (mousseure) di sint Djhan» u tot biesmint, «Sint-Djhan»).

Discrijhaedje

Elle est 20 a 80 cm hôte.

Si bodje å cotoû poligonike est plin.

Les foyes sont ôturnêyes, longowes, avou des dints di diferinnès longueurs et èn arondi coron.

Les fleurs vinèt a tcheslete, li cour est djaene et les florifoyes sont blankes.

Uzaedjes

po djouwer

Les djonnès djins råynut les florifoyes po-z adviner leu-z avni. I deynut :

• paradis / purgatwere / infier (po sawè la k' il iront après leu moirt)
• ritche / pôve / xhalé / bossou (les crapådes, po sawè kî çki les va vni hanter)
• tchestea / måjhone / barake (po sawè la k' i dmeurront pus tård).

po magnî

Les raecinêyes sont bounes estant parbolowes. Les foyes sont-st ene miete soucrêyes; ele polnut esse radjoutêye a del salåde.

Les fleurs eto sont magnåves. On les pout ossu mete po gåyoter ene salåde.