Martial VI.60
Laudat, amat, cantat nostros mea Roma libellos,
meque sinus omnes, me manus omnis habet.
Ecce rubet quidam, pallet, stupet, oscitat, odit.
Hoc volo: Nunc nobis carmina nostra placent.

Liber I, 33
Non amo te, Sabidi, nec possum dicere quare:
Hoc tantum possum dicere, non amo te.

II.38
quid mihi reddat ager quaeris, Line, Nomentanus?
hoc mihi reddit ager: te, Line, non video.

III.53 Ad Chloen, a qua abstinere se potuisse dicit.
Et vultu poteram tuo carere,
Et collo, manibusque cruribusque,
Et mammis, natibusque clunibusque:
Et, ne singula persequi laborem,
Tota te poteram, Chloë, carere.

VIII.69 In Vacerram, qui solos poetas mortuos laudabat
Miraris veteres, Vacerra, solos,
Nec laudas nisi mortuos poetas.
Ignoscas petimus, Vacerra: tanti
Non est, ut placeam tibi, perire.

VII, 29
Das Cattis, das Germanis, das, Caelia, Dacis:
Nec Cilicum spernis, Cappadocumque toros:
Et tibi de Pharia Memphiticus urbe fututor,
Navigat a rubris et niger Indus aquis:
Nec recutitorum fugis inguina Judaeorum,
Nec te Sarmatico transit Alanus equo.
Qua ratione facis, cum sis Romana puella,
Quod Romana tibi mentula nulla placit? ( )