Koyaanisqatsi
Koyaanisqatsi: Life out of balance (Koyaanisqatsi: Sit-tiâu ê seng-oa̍h, 1983) sī Godfrey Reggio kàm-tok ê 1 chhut kì-lo̍k-phìⁿ. Phìⁿ thàu-kòe pàng-bān, ká-kín ê iáⁿ-siōng piáu-hiān chhut kok-chióng chū-jiân kap jîn-chō ê hiān-siōng, chhin-chhiūⁿ soaⁿ-khut lāi ê piah-oē, tāi-chū-jiân ê hái-éng, hûn, kau-thong ê chó·-ha̍p, chà-toâⁿ po̍k-chà, tōa-to·-chhī ê bīn-chhiuⁿ, téng-téng. Bē-su teh kó·-lē lâng pí-phēng, liân-sióng "chū-jiân" kap "jîn-chō" chi-kan ê koan-hē.
| Koyaanisqatsi | |
|---|---|
| Kàm-tok | Godfrey Reggio |
| Chè-chok |
Francis Ford Coppola Godfrey Reggio |
| Kio̍k-chok-ka |
Ron Fricke Michael Hoenig Godfrey Reggio Alton Walpole |
| Phòe-ga̍k | Philip Glass |
| Liap-iáⁿ-su | Ron Fricke |
| Chián-chip |
Ron Fricke Alton Walpole |
| Chhut-phìⁿ |
New Cinema kap Island Alive (Bí-kok) |
| Chiūⁿ-èng | 1983 nî 11 goe̍h 11 |
| Phìⁿ-tn̂g | 87 hun-cheng |
| Gí-giân | Eng-gí, Hopi-gí |
Chit phìⁿ kui chhut bô kóng oē, kan-taⁿ phòe-ga̍k tang-tiong ū lâng têng-ho̍k liām 1 kù koyaanisqatsi kap kî-thaⁿ kúi-kù-á oē. "Koyaanisqatsi" sī Hopi-gí, ì-sù kóng "pāi-tek, loān-chhī-chhā ê seng-oa̍h", "sit-tiâu ê seng-oa̍h". Chhut-bóe ū phah Hopi chhàm-gí ê Eng-bûn hoan-e̍k. Im-ga̍k sī Philip Glass choan-kang ūi phìⁿ tēng-chok ê chok-phín.
Kui chhut 87 hun-cheng. Chè-chok ê sî-kan ū 6-tang kú, kî-tiong 3 tang teh phah-phìⁿ, 3 tang teh phòe ga̍k. Kin-kù in ê kóng-hoat, Reggio hām Glass 2 lâng hō·-siong éng-hióng: Glass kiàn-nā oân-sêng 1 pha, Reggio ē tńg khì siu-chián i ê iáⁿ-phìⁿ hō· in ē-tit-thang koh khah sù-phòe; liáu-āu Glass iū-koh tńg khì chhiâu i ê chhòng-chok, án-ne teh chìn-hêng.
Ū kúi-nā-chhut phìⁿ chiap-sòa Koyaanisqatsi: Powaqqatsi kap Naqoyqatsi 2 tōa chhut, kap 2 chhut té-phìⁿ hō-chò Anima Mundi, Evidence.