Wangari Maathai

Wangarĩ Muta Maathai (1940 nî 4 goe̍h 1 ji̍t chhut-sì ) sī 1-ūi Kenya ê khoân-kéng kiam chèng-tī ūn-tōng-chiá. Tī 2004 nî i chiâⁿ-chò tē-1-ê tio̍h Nobel Hô-pêng Chióng ê Hui-chiu cha-bó͘-lâng. Nobel Úi-oân-hōe khéng-tēng i tùi "iân-sio̍k-sèng khai-hoat, bîn-chú, hô-pêng ê kòng-hiàn".

I tī Bí-kok siū tāi-ha̍k kàu-io̍k. I sī tē-1-ūi the̍h-tio̍h phok-sū ha̍k-ūi ê Tang Hui-chiu cha-bó͘-lâng. Tī 1971 nî i chiâⁿ-chò Nairobi Tāi-ha̍k ê siū-i-ha̍k kàu-siū.

I oân-ná sī Chheⁿ-tòa Ūn-tōng (Green Belt Movement) ê hoat-khí-jîn. Chit ê chháu-kin khoân-pó thoân-thé tùi 1977 nî sêng-li̍p kàu taⁿ, chèng liáu 1,200-bān châng chhiū-á.

I mā koan-sim cha-bó͘-lâng ê gī-tê. I bat tam-jīm kòe Maendeleo Ya Wanawake ("Kenya Kok-ka Cha-bó͘-hōe") ê chú-se̍k.

Daniel Arap Moi hoāⁿ--ê chèng-hú bat lia̍h i ji̍p kaⁿ-ga̍k kúi-nā-pái. I kó͘-chhui to-tóng-phài ê soán-kí chè-tō͘, ho͘-io̍k tō͘-choa̍t hú-pāi kah pō͘-lo̍k chèng-tī. I bat hō͘ lâng iōng po̍k-le̍k kong-kek.

I tī 2002 nî sêng-kong soán-tiâu ji̍p kok-hōe. Chū 2003 nî, i tī sin chèng-hú ê Khoân-kéng, Chū-jiân chu-goân, kah Iá-seng Tōng-bu̍t chit ê pō͘-mn̂g tam-jīm hù-pō͘-tiúⁿ.

Gōa-pō͘ liân-kiat

Nobel Chióng (Eng-bûn)
The Green Belt Movement (Eng-bûn)