三菱Fuso Rosa

三菱Fuso Rosa，有時就咁叫三菱Rosa，係日本三菱Fuso出嘅一款小巴。

三菱Fuso Rosa 三菱ふそう・ローザ Mitsubishi Fuso Rosa
第三代三菱Rosa 第四代三菱Rosa
製造廠	新三菱重工業（1960年－1964年） 三菱Fuso（1964年－）
邊道出	日本名古屋（1960年9月－2010年4月） 日本富山市（2010年6月－）
製造年份	1960年—
主要對手	豐田Coaster/日野Liésse II 日野Rainbow小巴 日產Civilian 五十鈴Journey 萬事得Parkway
規格
長	5.4米至7.73米
引擎	三菱
波箱	棍波 自動波 DUONIC自動/加減波

三菱Rosa喺1960年面世，當時由新三菱重工業（前中日本重工業，由三菱重工業拆出嚟）出，叫三菱Rosa（三菱ローザ）。喺1964年三間由三菱重工業拆出嚟嘅公司合番埋做三菱重工業，三菱Rosa正式成為三菱Fuso旗下產品，並喺1966年取代同廠MB720小巴嘅地位。

Rosa喺1973、1986同埋1997年加埋改過三次款。除咗後輪驅動嘅Rosa之外，三菱亦自1990年推出四驅版Rosa小巴。

Rosa小巴除咗喺日本本土賣之外，亦有出口去亞洲、非洲同埋中南美洲多個地區。

生產史

第一代

1960年，新三菱重工業推出咗三菱Rosa，型號係B10型。佢係由同廠嘅「三菱Jupiter」貨車底盤發展而成，車身大概長5.4米，款式同當年嘅平治O319相似。佢初時係用JH4汽油引擎，但好快就有得揀KE31柴油引擎。喺往後八年間，由B10型加長而成嘅唔同版本Rosa相繼出現，全長6.25米或者7米，用過KE36、KE63同埋KE65柴油引擎，型號係B20D、B21D、B22D、B23同埋B24。

1966年，三菱重工業推出廉價版Rosa，全車輕量化，車身大概長5.85米，款式同B10同埋B20系有啲唔同。最早出場嘅係B12型，行單尾胎，配KE42汽油引擎或者KE63柴油引擎。1969年廉價版Rosa有小改動，車頭燈由四盞圓燈改成兩盞方燈，水箱網轉咗款，車側指揮燈加大咗，配KE47汽油引擎（車型代號B13）或者4DR1柴油引擎（車型代號B14），另新增孖尾胎版本（車型代號B13A或B14A）。1970年嗰時，車頭燈又改返做四盞圓燈，並且多咗4DR5柴油引擎（車型代號B16A）選擇。

• 
  Rosa B22D型

第二代

1973年，Rosa作出第一次大改款，所有Rosa車身款式統一。首先推出嘅短陣版，全長6.12米，除咗原有嘅4DR5同埋KE47引擎以外，亦有得揀4G53汽油引擎。型號有行單尾胎嘅B200、B205、B207，同埋行孖尾胎嘅B210、B215、B217。全長大概6.9米嘅B360型遲幾個月現身，配6DR5柴油引擎。

1979年，Rosa修改咗車頭設計，擋風玻璃加大咗，車頭指揮燈、泵把都唔同款；車尾燈由圓燈改為方燈。短陣版有得揀4G53汽油引擎同埋4D30柴油引擎，後者重有得揀單尾胎版；而長陣版就繼續係6DR5，幾年後俾4D31渦輪增壓連直接噴注柴油引擎取代。由呢個時候開始，型號代號亦都改咗，包括有BC2系（短陣汽油版）、BE2系（短陣柴油版）同埋BH2系（長陣柴油版）。

1981年三菱推出長7米、闊近2.3米嘅BK2系闊身版Rosa，配6D14引擎。佢啲車轆係有6粒絲帽，有別於同期其他Rosa嘅5粒。

• 
  Rosa BE211D（矮車頂）
• 
  Rosa BH2系
• 
  Rosa BK215F

• 
  BE2系、BH2系車尾，圖中嘅車係BH2系
• 
  BK215F車尾

第三代

1986年，三菱推出第三代Rosa，有短陣（全長6.2米）同埋長陣（全長6.95米）版，同時單尾胎版絕咗跡。新設計車身引入咗更多人體工學設計，車頭燈可以係圓燈或方燈，有啲車有車側指揮燈。第三代Rosa可以揀嘅引擎都係四氣缸，初時可以配4G53（只限出口）、4D30（只限出口）、4D31同埋新增嘅4D32直接噴注柴油引擎。視乎引擎選擇，車型代號包括有BC4系（汽油版，只限出口）同埋BE4系（柴油版），上一代嘅BH2系同埋BK2系分別俾長陣版BE4系同埋尾橫置引擎嘅MK126取代。

1990年，Rosa作咗一次小改，車咀設計修改咗，車頭燈稍為向下移。新增咗兩款直接噴注柴油引擎選擇，包括4D33同埋有渦輪增壓嘅4D34，另外亦開始有得揀自動波。日本本土嘅高級規格開始有得揀前獨立避震。另外加入BG4系四驅車（只限長陣版），車身比BE4系高咗一截。

1992年開始，日本本土嘅高級規格亦可以揀前獨立加後氣墊避震。

1993年，4D36渦流室式柴油引擎取代咗日本本土市場嘅4D32引擎選擇。

1995年，Rosa嚟多一次小改。車咀設計再一次修改，車頭燈同當時嘅Aero Bus MS8/MM8系列相似，不過亦有啲車係用兩對方形車頭燈。4D35直接噴注柴油引擎取代咗日本本土市場嘅4D33引擎選擇。

• 
  早期版本（長陣）
• 
  中期版本（短陣，圓形車頭燈，香港）
• 
  中期版本（四驅版，方形車頭燈）
• 
  後期版本（長陣）
• 
  後期版本（長陣，方形車頭燈，臺灣）
• 
  車尾

第四代

1997年，三菱推出第四代Rosa。頭軸同埋引擎室都移前咗，車門可以擺到有咁前得咁前；車身經過重新設計，減低風阻，圓形車尾燈係特色之一。四驅版車身高度改到同一般嘅尾驅版一樣，頭軸亦改成獨立避震，但繼續只有長陣版。車身繼續有短陣（全長6.25米）同埋長陣（全長7米）版，波箱同埋避震維持返上一代嘅選擇。車型代號分別係BC6系（汽油版，只限出口）、BE6系（柴油版）同埋BG6系（四驅版）。

初時日本本土版嘅引擎選擇有新嘅4M50渦輪增壓、4M51自然吸氣同埋舊有嘅4D36渦流室式柴油引擎，而出口版就有4G64（汽油）、4D32、4D33同埋4D34。

1998年，全長7.73米嘅超長陣版推出，同時供應日本本土同埋出口市場。

1999年，三菱重新喺日本本土版Rosa引入4D33引擎，取代咗4D36引擎，自此Rosa配嘅柴油引擎都係直接噴注形式。同時前獨立加後氣墊避震配搭俾前獨立加全氣墊避震取代。

2000年，三菱推出仿古式凸頭設計嘅Rosa，一直出到2004或2005年。佢可以配4M50或者4M51引擎。

2002年至大概2005年間，Rosa出過天然氣版，天然氣缸擺喺車底，引擎係由4D34改裝而成。

2004年，日本本土版引擎選擇得返4M50一款，自此4M51冇再配落Rosa度。

2005年開始，左邊安全車窗對上有Rosa標誌，車尾窗右下角有三菱Fuso標誌。

2007年，Rosa作咗一次小改，車咀設計修改過，水箱網同埋泵把變咗。4M50引擎亦開始喺出口版出現，畀需要歐盟四型或以上排放標準嘅地方用。喺呢次小改之前，BC6系已經停產。

2008年開始，仿古凸頭版Rosa又出產咗一段短時間。

2010年，三菱Fuso喺名古屋嘅工場關閉，Rosa嘅生產線搬咗去富山縣富山市嘅三菱Fuso巴士製造廠房。

2011年，Rosa嚟多一次小改。車咀設計變咗少少，原本喺左邊安全車窗對上嘅Rosa標誌搬咗去車頭水箱網。氣墊避震選擇取消咗，而前後葉片彈簧避震嘅版本改為只限出口。日本本土版引擎選擇改為新開發嘅4P10，佢亦被出口去一啲歐盟五型排放標準嘅地方用。佢可以配棍波或者新嘅DUONIC六前速雙極力子自動/加減波。BG6系四驅車一度暫停生產，到2015年至出返。

2018年，日本本土版車咀設計改款，改用全新嘅「Fuso黑帶」設計，Rosa標誌去返左邊安全車窗度。出口版繼續維持舊有嘅2011年車咀設計。

2019年底三菱Fuso向日本本土推出新嘅Rosa型號，外貌同早一年推出嗰款冇大分別，但增加咗一系列行車安全裝置，司機位佈局改為同同期Canter貨車一致，型號改為BE7同埋BG7系。2020年底開始，Rosa BE7系開始向海外推銷。

• 
  初期版本（四驅版）
• 
  初期版本（超長陣版，澳門）
• 
  初期版本（2005年起，長陣版）
• 
  仿古凸頭版
• 
  2007年小改（短陣版）
• 
  2007年小改（長陣版，香港）
• 
  2011年小改（長陣版）
• 
  2011年小改（長陣版，香港）
• 
  2011年小改（長陣版，臺灣）
• 
  日本2019年型號
  （BE740G長陣，東京車展2019）

• 
  車尾（冇太平門，2005年以前）
• 
  車尾（有太平門，2005年以後）
• 
  車尾（闊尾門，2005年以後）
• 
  車尾，2011年小改之後，有右軚版改咗死氣喉設計，右下角唔使留位畀死氣喉出口

出面網頁

• 三菱Fuso Rosa（日文）
• 三菱Fuso Rosa（英文）
• 初代Rosa嘅介紹：第一頁、第二頁 （日文）